Sch'i va tenor las partidas giuvnas dals cristiandemocrats e dals burgais-democrats, pudessan ils zains da nozzas da las duas partidas er tutgar en Grischun. Els vesan quasi be avantatgs:
Uschia pudain nus rinforzar la politica dal center.
La PCD giuvna fiss schizunt pronta, da sacrifitgar il «C» da ses num en favur d'ina collavuraziun.
Ed er Martina Widmer, presidenta da la giuvna PBD punctuescha ils avantatgs d'ina nozza. Quella purtass «in nov profil, dapli schlantsch ed er novs commembers.»
Critica envers ina fusiun
Exact quai «profil» che Widmer menziuna, manca tenor Roland Tremp da la gruppa da la PCD 60+ a la partida fusiunada. El è sceptic:
Allianza dal center – quai na di nagut.
Il pled «cristiandemocratic» saja bler pli cler. Insumma saja la sperdita dal «C» in grond factur che fetschia ad insaquants commembers ch'èn schon pli ditg en la partida sceptics envers la fusiun.
Er Gieri Luzi da la PBD n'è betg intgantà da parter in letg politic cun la PCD. Il privel ch'el vesa è, che la PBD daventia il «partenari pitschen» da la PCD e va a perder. Collavurar possian las partidas bain, dentant ina fusiun saja betg necessaria – in zic concurrenza fetschia numnadamain er en il center bain a la politica.
Dentant er sch'els èn critics envers ina fusiun, na muntia quai betg, ch'els sajan cunter ina fusiun. I na saja betg pli il pensum dad els sco commembers plitost vegls da decider questa dumonda. Quella decisiun veglian els surlaschar als giuvens.
