Gia per la terza giada quest onn averteschan la Polizia chantunala e la procura publica dal Grischun da cugliunarias cun investiziuns da daners online. Tenor ina communicaziun haja l'atun da quest onn ina persuna investì passa 600'000 francs e pers tut.
Polizia dat tips co evitar cugliunarias
La procura publica e la polizia cusseglian da restar realistic e da betg sa laschar tschorventar d'empermischuns da multiplicaziuns miraculusas dals daners. Cun insistenza avertescha la polizia da betg far transacziuns da daners online cun persunas nunenconuschentas.
La Polizia chantunala fa attent da resguardar ils suandants puncts:
- discutar investiziuns cun la banca u cun la cussegliadra / il cussegliader da confidenza
- en nagin cas spedir copias da la carta d'identitad u dal passaport
- betg far investiziuns sut squitsch da temp
- betg laschar sa tschorventar d'ina preschentaziun professiunala
- far mo investiziuns da daners ch'ins chapescha
