Siglir tar il cuntegn

Header

cuntegn

Procura publica Turitg Chasti cundiziunà per Remo Stoffel

Pervi da falsificaziun da documents e suppressiun da documents ha Remo Stoffel survegnì in chasti cundiziunà da 180 dis. Cun questa sentenzia ha la procura publica per criminalitad d'economia da Turitg serrà giu sias examinaziuns en il cas da Stoffel.

Mess ad ir l'inquisiziun penala aveva l'Uffizi chantunal da taglia l'october 2016. Dasper falsificaziun da documents han ins era renfatschà a Stoffel fraud fiscal, ha communitgà la procura publica. Las renfatschas stattan en connex cun la cumpra da l'interpresa Avireal SA entras la Ability SA. Quai era capità gia ils 28 d'avrigl 2005.

La procura publica è vegnida a la conclusiun che la bilantscha intermediara da Avireal, dals 30 da zercladur 2005 ed ina conferma da la banca dal 2009 na sajan betg stadas correctas. Tscherts documents sajan plinavant vegnids zuppads fin il 2006. Stoffel haja laschà valair quests fatgs, malgrà che tschertas chaussas fissan surannadas en curt.

Cun las autoritads da taglia è Stoffel sa cunvegnì ed ha pajà «a moda substanziala taglia». Ina cauziun da 20 milliuns francs saja ida directamain da las autoritads penalas tar quellas da taglia, scriva la procura publica.

Laschà crudar ils auters puncts

Pervi da la cunvegna cun l'uffizi da taglia ed in'expertisa ha la procura publica laschà crudar ils auters puncts dal plant. La procura publica ha entant er serrà giu las examinaziuns pervi da fraud fiscal e delicts da documents. Il mandat penal e la disposiziun per sistir ils auters puncts ha cun quai vigur legala.

Pir il zercladur ha Stoffel pers in cas davant il Tribunal federal. El sto pajar suenter 60 milliuns francs taglia.

RTR novitads 17:00

Artitgels legids il pli savens

Scrollar a sanestra Scrollar a dretga