Ils uffizis chantunals sajan pronts da meglierar tar els la preschientscha dal rumantsch e dal talian. Da quest avis è la regenza grischuna. Ed era la schientscha per la muntada da la trilinguitad saja qua tar ils uffizis e tar las instituziuns linguisticas, scriva la regenza.
La regenza ha prendì per enconuschientscha il rapport dal Center per democrazia Aarau concernent promover las linguas en il Grischun.
Sco proxim datti in rapport cun mesiras concretas per ils differents secturs da l'agir statal che la regenza lascha elavurar il Departament d'educaziun e cultura.
