La pli impurtanta schluccada ord vista Grischuna sa chattian en la Gastronomia. Quai ha ditg il minister d'economia, Marcus Caduff, envers RTR. Naginas restricziuns sin terrassas, nagina limita da persunas vid ina maisa: Per il turissem da stad saja impurtant, ch'i dat uschè paucas restricziuns sco pussibel.
Impurtant saja ch'ins possia er vinavant far il contact-tracing, uschia Marcus Caduff. Ina persuna da mintga maisa sto numnadamain vinavant dar giu sias datas.
Occurrenzas grondas: impurtant a lunga vista
Er occurrenzas grondas cun plirs milla persunas èn puspè lubidas – silmain cun certificats da corona. Per uschè occurrenzas en Grischun durant la stad saja uss dentant memia tard, manegia Caduff. Tgi che n'ha betg schon cumenzà ad organisar, na possia il fanadur u avust betg porscher ina gronda occurrenza. Surtut en vista a l'atun sajan las schluccadas dentant impurtantas. Ellas porschian ina tscherta perspectiva, uschia Marcus Caduff.
Mo in «chavel en la schuppa»
Betg chapientscha ha il cusseglier guvernativ sulettamain per ina decisiun dal Cussegl federal. En rom privat èsi vinavant limità d'inscuntrar maximalmain 30 persunas en l'intern e 50 persunas dadora. Che quai na saja betg vegnir midà, na chapescha Marcus Caduff betg. I saja dentant, per dir uschia, il sulet chavel en la schuppa.
