Entaifer paucs dis è il dumber d'ospitalisaziuns en Grischun sa triplà. En il chantun datti mintga di mortoris en connex cun Covid-19. Malgrà ch'ils ospitals grischuns hajan anc capacitads, fetschia il svilup da las ospitalisaziuns quitads a las autoritads, quai scriva l'Uffizi chantunal da sanadad en ina communicaziun.
Actualmain sa chattian 615 persunas en isolaziun, 837 persunas sajan en quarantina e 45 persunas vegnian tgiradas en ospitals en connex cun Covid-19. 8 persunas ston vegnir respiradas artifizialmain. Mortas èn fin uss 59 persunas pervi da Covid-19.
Emprim agid psicologic
A partir da glindesdi, ils 9 da november, metta il chantun en funcziun in servetsch telefonic per l'emprim agid psicologic en il chantun Grischun. La helpline è in emprim post da consultaziun per persunas ch'èn en situaziuns difficilas pervi da la pandemia. Sin il numer po lura vegnir gidà vinavant.
Ier è la situaziun anc stada survesaivla
La media chantunala Marina Jamnicki aveva ier ditg avant las medias che la situaziun saja survesaivla. Perquai na spostian ils ospitals er betg operaziuns betg necessarias. Ella aveva dentant er fatg cler che la situaziun vegnia anc mendra en ils ospitals. En spezial perquai che las persunas sin las staziuns intensivas stettian per regla pli ditg.
Il cusseglier federal Alain Berset aveva la mesemna anc ditg en vista a la situaziun actuala, ch’i na saja betg acceptabel ch’intgins chantuns na spostian betg operaziuns betg urgentas.
Record da dumber da cas la gievgia – 10'128
En Svizra ed il Principadi da Liechtenstein hai dà durant 24 uras per la segunda giada passa 10'000 cas da corona. 399 persunas han da nov stuì vegnir ospitalisadas. Plinavant èn mortas 62 persunas vi dal virus.
Durant quellas 24 uras hajan ins fatg 38'727 tests. Durant las ultimas duas emnas han ins fatg total 400'000 tests. Da quels èn lura 26,4% stads positivs. Mortoris hai dà total 2'337.
En Grischun hai dà 128 novas infecziuns. 13 persunas han stuì vegnir ospitalisadas. En tut èn ussa 50 persunas en ospital, 9 da quels ston vegnir aspirads. En quarantina èn 918 persunas en isolaziun 609.
