Siglir tar il cuntegn

Header

cuntegn

Territoris da skis Terrassas avertas – il Grischun cunterfa a l'ordinaziun

Tenor l'Uffizi federal da sanadad BAG na dastgan las terrassas dals restaurants en ils territoris da skis betg avrir. Quai ha oz explitgà il giurist dal BAG, Mike Schüpbach:

Il chantun saja responsabel per la realisaziun da las ordinaziuns da la Confederaziun. Quella possia sulet far attent che l'ordinaziun na vegnia betg tegnida en. Sancziuns cunter il Grischun na sajan uschia il mument betg pussaivlas. Il chantun Grischun da sia vart ha confermà envers RTR ch’ins saja en contact cun il BAG ed ins emprovia da tschertgar ina soluziun.

Nova varianta dal virus sa derasa svelt

Ultra da quai han ils experts da la Confederaziun infurmà davart la derasaziun da la nova varianta dal coronavirus. Il dumber da quellas infecziuns crescha vinavant: Fin la gievgia ha il BAG dumbrà 160 cas d’infecziun cun la mutaziun dal virus – il mardi eran quai anc 127 cas. Quest svilup saja stà da spetgar ha ditg Patrick Mathys dal BAG oz avant las medias – ed el fetschia era quitads. Ins stoppia quintar ch’il dumber sa dublegia mintg’emna.

Cifras dals 14 da schaner

En Svizra ed il Principadi da Liechtenstein èn vegnidas annunziadas la gievgia 2'474 novas infecziuns cun il coronavirus. Cunquai è la media dals davos set dis tar 2'659 novs cas da Covid-19 per di. Ultra da quai ha l'Uffizi federal da sanadad BAG registrà 53 ulteriurs mortoris en connex cun Covid-19 e 106 novas ospitalisaziuns.

En il Grischun datti 90 novas infecziuns confermadas e dus ulteriurs mortoris. 43 persunas vegnan tgiradas en l'ospital pervi da Covid-19.

RTR novitads

Artitgels legids il pli savens

Scrollar a sanestra Scrollar a dretga