Stop & go – uschia descriva la media chantunala dal Grischun, Marina Jamnicki, la situaziun actuala da vaccinar. I dettia adina puspè infurmaziuns da la Confederaziun puncto furniziuns da vaccin. Quai na saja dentant tut betg confermà e segir che las dosas empermessas vegnian er propi.
Per 5'000 persunas hai uss pia puspè vaccin – quel vegn repartì ils proxims dis, las proximas emnas. Il mument vaccinescha il Grischun cun ils vaccins da Pfizer/Biontech e Moderna. Entant èn passa 16'500 persunas en il Grischun s'annunziadas per sa laschar vaccinar. Perquai dovria quai vinavant pazienza. Marina Jamnicki è da l'avis, ch'i va anc fin l'atun enfin che 60-70% da la populaziun èn vaccinads. Fin uss han strusch 8'000 persunas en Grischun survegnì ina dosa e passa 3'600 la segunda.
En l'entira Svizra han 50'000 survegnì la segunda dosa
En l'entira Svizra han entant in mez milliun persunas survegnì l'emprima dosa d'in vaccin cunter Covid-19 e 50'000 han survegnì la segunda dosa. Quai ha ditg Nora Kronig, la vice-directura da l'Uffizi federal da sanadad. En cumparegliaziun internaziunala possian ins esser superbi.
Plinavant ha ella valità sco positiv la repartiziun interchantunala dals vaccins per che 8 chantuns han uschia pudì segirar la segunda dosa. Ina sfida restian però las stretgas da furniziun actualas. Qua speria la Confederaziun ch'i dettia bainbaud ina midada.
