Tranter ils aspectaturs ed aspectaturas da la sairada èn tranter auter medis, responsablas per emprendists ed emprendistas, patruns da lavur e persunas da segiranzas.
Tenor cifras d’ina retschertga da la promoziun da la sanadad Svizra han 55 pertschient dals giuvenils problems u ina chargia psichica. Persunas tranter 15 e 34 sajan pertutgadas pli savens da malsognas psichicas. D’ina vart prenda la chargia tiers, da l’autra vart van las persunas era adina pli savens per agid professiunal. Quai ha era constatà Sereina Venzin en sia practica, ella è psicologa ed ha tegnì in referat a la sairada da reWork a Cuira. La retegnientscha è betg uschia gronda, perquai ch’els èn pli sensibilisads. En congual cun persunas creschidas che fan dapli patratgs sch’els duessan uss propi ir tar ina psicologa u na.
Las persunas giuvnas da questa vegliadetgna èn savens en ina scola u fan in emprendissadi. Là èsi impurtant che persunas en lur conturn restan alertas per segns che pudessan esser in avertiment. Quai pudess esser sche las persunas sa retiran socialmain – per exempel sch’els na vegnan betg pli cun tuts ils auters en la pausa da café. U sche la persuna fa tuttenina dapli sbagls che al cumenzament, ma era sch'insatgi è pli stanchel u pli pauc motivà.
Sper quai pudess in indizi era esser che il consum d’alcohol s’augmenta u sche la persuna mangia pli pauc. Da vesair quests segns è dentant difficil. Tenor Sereina Venzin ins haja era betg da dramatisar tals cumportaments. Tuttina fai segn da pledantar quai. Forsa dumandar sco che la persuna stat e dir ch’ins haja l’impressiun ch’ella para betg uschia cuntenta.
Pli gugent pledentar ina giada memia bler che ina giada memia pauc.
Era impurtant è da betg mussar cun il det mussader sin ils pertutgads – critica na gida nagut. I è numnadamain bain pussaivel che las persunas giuvnas èn surdumandadas en questa vegliadetgna. Saja quai cun il pass en il mund da lavur, il squitsch da lavur e notas, il congual permanent cun as medias socialas, quitads pervi da temas mundials u era il svilup corporal e persunal. Il facit è, da pledentar en mintga cas il tema. Tenor las psicologas e psicologs che han tegnì in referat na discurran 68 pertschient dals giuvenils betg sa sez anora.
Co funcziuna quai en il mintgadi?
En ils referats è vegnì declerà sco che i fiss optimal dad ir enturn cun persunas giuvnas che mussan in auter cumportament sco usità. En il mintgadi da lavur na saja quai dentant betg uschia simpel dian divers responsabels d’emprendistas ed emprendists. Il badar saja il pli grev ed alura è mintgatant era memia tard da reagir. Uschia che intgins emprendissadis èn alura vegnì ruts giu. In auter responsabel di, che el bada che sias emprendistas èn focusadas fermamain sin las medias socialas e che quai na fatscha betg bain. Tuts suttastritgan che in contact regular ed ina relaziun da confidanza saja impurtanta – surtut en quests onns d’emprendissadi che pretendan bler da las persunas giuvnas.