Pervia da dus motivs po Lukas Walser, il manader dal resort da chatscha tar l'Uffizi chantunal, esser cuntent cun la chatscha 2025: Per ina hajan las chatschadras e chatschaders sajettà circa tants tschiervs e chamutschs sco ils onns avant, en in pau dapli chavriels. Per l'autra n'haja betg dà pli gronds accidents.
Ina da las finamiras da l'uffizi è da sajettar quest onn var 4'800 tschiervs. Cun var 3'500 na saja quai dentant betg gartegià curant la chatsch'auta. Per la chatscha speziala munta quai che var 1'300 ulteriurs animals ston vegnir sajettads. E quella cifra saja pli bassa sco l'onn passà.
Var 1'200 tschiervs durant la chatscha speziala
Uss è l'uffizi vidlonder d'analisar las cifras e da crear ils plans per la chatscha speziala. Els decidan pia quants tschiervs che ston anc vegnir sajettads en tge regiun. Cun quai che la finamira è cun var 1'200 tschiervs pli bassa ch'auters onns, pudessi er dar ch'ina chatscha speziala na fa en tschertas regiuns betg pli basegn. Actualmain na saja dentant memia baud per discurrer davart differenzas regiunalas. La chatscha speziala va lura liber il november.
Var in quart da las persunas ch'èn idas a chatscha han nizzegià ina varianta digitala per far statistica. Quai era ina da las novaziuns da quest onn. Ils resuns sajan là fitg buns, uschia Lukas Walser. Er da valitar las datas e per la planisaziun da la chatscha speziala saja quai in avantatg.
Qua chattais fotografias, salids, istorgias ed infurmaziuns enturn la chatscha grischuna.
Sajettà 14 lufs – 7 da chatschaders
Durant il temp actual na vegn betg be regulà la populaziun da selvaschina. Er per tscherts lufs ha il chantun survegnì la lubientscha da la Confederaziun per tils regular. Tenor l'Uffizi da chatscha e pestga hajan ins fin oz sajettà 14 lufs. Quai saja en il rom da la regulaziun da l'onn passà. Dals 14 lufs han chatschaders e chatschadras sajettà 7. Tenor il chantun sajan ins cuntent cun quel sustegn.
Adattà al tema
Pertge fascinescha la chatscha talmain e tge tutga tut tar il pli bel temp da l'onn? Quai ha Livio Chistell vulì chattar ora ed ha visità chatschaduras e chatschadurs en l'entir Grischun a la tschertga da respostas. In dad els era Niculin, ch'è gia sco giuven bunamain in expert da chatscha.