Siglir tar il cuntegn

Header

audio
Chatscha speziala: Betg cuntanschì il dumber giavischà
Or da Actualitad dals 22.12.2023. Maletg: Keystone
laschar ir. Durada: 3 minutas 52 Secundas.
cuntegn

Chatscha speziala Bunamain 500 animals avess'ins anc stuì sajettar

Il fazit da la chatscha speziala da quest onn sveglia discussiuns. Las chatschadras ed ils chatschaders n'han betg cuntanschì la finamira ch'il chantun ha definà. Il resultat è magher.

Era quest onn hai puspè dà chatscha speziala en il Grischun cunquai ch'il dumber giavischà dal chantun n'è betg vegnì cuntanschì durant la chatscha auta. Passa 2'200 vatgas-tschierv avessan las chatschadras ed ils chatschaders stuì sajettar durant la chatscha speziala.

Bilantscha dischillusiunanta

La chatscha speziala en la regiun Filisur/Bravougn è gia terminada dapi ils 14 da december – d'eleminar fissan dentant anc 113 vatgas-tschierv e lur vadels. Quai sulettamain per ina regiun. Sch'ins guarda sin l'entir chantun, alura èsi 475 vatgas-tschierv ch'ins avess anc stuì sajettar. Quai en las regiuns ch'han gia terminà la chatscha speziala dapi ils 14 da december.

L'onn passà avevan chatschadras e chatschaders sajettà passa 90 tschiervs memia pauc. Quest onn passa 500 animals.

Abschusszahlen Sonderjagd Hirsch Graubünden 2023
Legenda: La carta mussa nua ch'igl è anc da sajettar quants tschiervs. Stan 14 da december. En las regiuns verdas è la chatscha supplementara gia terminada. Uffizi da chatscha e pestga

Pensum memia grond per guardiaselvaschinas

Normalmain elemineschan guardiaselvaschinas ils animals che restan anc suenter la chatscha speziala. Tar 80 u era 90 animals n'è quai era nagin problem. D'eleminar passa 500 u dapli animals saja dentant ina sfida pli gronda, uschia il chantun.

Cumenzament schaner da l'onn proxim, vegn il chantun a prender posiziun, sco ch'el ha communitgà.

RTR actualitad 17:00

Artitgels legids il pli savens