Siglir tar il cuntegn

Header

video
Bilantscha provisorica da la chatscha grischuna
Or da Telesguard dals 26.10.2022.
laschar ir. Durada: 1 minuta 49 Secundas.
cuntegn

Malgrà buna chatscha 2022 I dovra er chatscha speziala sin chamutschs d'in onn

Per cuntanscher ils plans da regulaziun ha il chantun ordinà ina chatscha speziala sin chavriels, tschiervs e portgs selvadis. Per l'emprima giada ston er chamutschs d'in onn vegnir sajettads, quai pervia da donns da guaud.

Er quest onn dovri ina chatscha speziala durant il november e december en il Grischun. En tut las 21 regiuns ston anc vegnir sajettads en tut 2'158 tschiervs. Pervia da la buna chatscha da tschiervs èn quai 300 pli pauc ch'anc l'onn avant. Quai communitgescha l'Uffizi da chatscha dal Grischun. Ils blers tschiervs ston vegnir sajettads en la Mesolcina, Calanca, Foppa, Lumnezia sco er Alvra e Surses.

La carta mussa quants tschiervs che ston vegnir sajettads en las differentas regiuns.
Legenda: La carta mussa quants tschiervs che ston vegnir sajettads en las differentas regiuns. RTR

En 14 da las 21 regiuns dovri ina chatscha supplementara sin chavriels, quai per sajettar en tut 367 chauras-chavriel ed ansiels. Ordinada è questa chatscha per exempel en il Partenz, Tavau, Val dal Rain enfin Stussavgia, parts da l'Engiadina e Samignun, Puschlav, Mesolcina e Calanca.

La carta mussa quants chavriels che ston vegnir sajettads en las differentas regiuns.
Legenda: La carta mussa quants chavriels che ston vegnir sajettads en las differentas regiuns. RTR

Chatscha sin chamutschs e portgs selvadis

Per l'emprima giada insumma ha il chantun ordinà da sajettar chamutschs d'in onn, quai en las regiuns Val dal Rain e Tumleastga. La raschun è d'evitar pli gronds donns entras selvaschina en ils guauds. Questa chatscha vegnia dentant restrenschida sin quatter regiuns problematicas.

Er ils portgs selvadis ston ins regular vinavant, perquai ch'els chaschunan gronds donns en l'agricultura en la Mesolcina. Els dastgan vegnir sajettads senza contigent durant la chatscha il november e december.

Sistem en duas fasas fa vinavant senn

Malgrà che la chatsch'auta è stada buna pervi da las bunas cundiziuns da l'aura datti er quest onn ina chatscha speziala. Quai fetschia er senn e saja sa cumprovà, uschia Hannes Jenny da l'Uffizi da chatscha e pestga. Che chatschadras e chatschaders stoppian anc sajettar 40% dal dumber da tschiervs saja en il rom dals davos onns. La raschun per quai è tranter auter che blers tschiervs èn actualmain anc gnanc en il Grischun.

Nus avain in'immigraziun da tschiervs ord 11 pajais, chantuns e provinzas cunfinantas ed igl è in fauss intent da vulair regular quai gia finalmain durant il settember.
Autur: Hannes Jenny substitut manader da l'Uffizi da chatscha e pestga GR
audio
Bilantscha chatscha: Funcziuna il sistem actual?
ord Actualitad dals 26.10.2022. Bild: MAD
laschar ir. Durada: 2 minutas 53 Secundas.

Il concept da duas fasas ch'è vegnì sviluppà da l'uffizi saja fatgs aposta per la situaziun en il Grischun cun tschiervs che migreschan. Cun quest sistem saja er pussaivel da cuntanscher la finamira da sbassar la populaziun dals tschiervs, uschia Hannes Jenny vinavant.

Da decimar il dumber da selvaschina gidia dentant er la populaziun da lufs ch'è creschida.

Per part èn dapli vatgas da tschierv vegnidas sajettadas perquai ch'ellas han pers lur vadels durant la stad.
Autur: Hannes Jenny substitut manader da l'Uffizi da chatscha e pestga GR

En tschertas regiuns hajan ils lufs er procurà per ina meglra repartiziun da la selvaschina e quai haja er manà tar dapli animals sajettads. Sper quai dettia er regiuns nua ch'ils lufs han effectiv decimà il dumber da selvaschina. Il luf vegnia en scadin cas er en il futur a gidar da cuntanscher las finamiras da l'Uffizi da chatscha e pestga puncto regulaziun.

RTR novitads 09:00

Artitgels legids il pli savens

Scrollar a sanestra Scrollar a dretga