Parallelmain cun la derasaziun dals lufs en il chantun Grischun è er il dumber da chauns da protecziun per las muntaneras creschì. Uschia vegni er tar attatgas da chauns da protecziun sin carstgauns. En in cas succedì la fin da zercladur en il territori da Maighels è in um vegnì attatgà da tschintg chauns da protecziun. Quai ha il president communal da Tujetsch Martin Cavegn ditg sin dumonda da la FMR. Pervi da sia blessura haja l'um stuì sa render en tractament d'in medi.
Silsuenter ha l'um fatg ina denunzia tar la Polizia chantunala, sco quella ha confermà sin dumonda da la FMR. Sco Roman Rüegg dal post da communicaziun da la polizia scriva, saja ella stada en contact cun l'Uffizi per la segirezza da victualias e per la sanadad d'animals. Quel saja responsabel per decretar mesiras areguard ils chauns.
Prendì mesiras administrativas
Giochen Bearth, il manader da l'Uffizi per la segirezza da victualias e per la sanadad d'animals ha confermà il cas. El constatescha: «Il temp da quest cas a Maighels eran tschintg chauns da protecziun là en la vischinanza en servetsch d'ina muntanera. Quants da quels chauns che han mors la persuna attatgada na savain nus betg.»
Nus avain instradà mesiras administrativas per impedir ch'in tal cas sa repetia.
Cunter questas mesiras po il possessur dals chauns far recurs. Tenor Giochen Bearth po mintga persuna far ina denunzia tar la polizia sch'ella vegn attatgada u morsa da chauns. Medemamain po ella annunziar il cas cun il formular sin la pagina d'internet da l'Uffizi per la segirezza da victualias e per la sanadad d'animals dal Grischun.
Mintga medi haja er l'obligaziun d'annunziar cas, sche persunas sajan vegnidas tar el en tractament medicinal pervi d'ina blessura chaschunada d'in chaun, di Giochen Bearth. Da prender mesiras saja sulettamain pussaivel sch'ils cas sajan annunziads. Las denunzias sajan da far tar la polizia, da là arrivian quellas tar la procura publica e tar l'uffizi. Las mesiras che l'Uffizi per la segirezza da victualias e per la sanadad d'animals possia prender èn fitg differentas. Cumandar da durmentar in chaun saja la pli davosa mesira, quai saja l'excepziun absoluta, constatescha Giochen Bearth.