Savens han ins in'idea romantica da la lavur da las pasturas e dals pasturs. In'activitad en la natira, en contact cun ils animals, lunsch davent da la vita hectica da la citad.
Jan Boner, cussegliader per la protecziun da muntaneras al Plantahof, mussa si la realitad davos la romantica: «Mez zercladur ston las pasturas ed ils pasturs da nursas esser pronts da manar ad alp ina muntanera da 600 fin 800 animals. Savens be cun agid da lur chauns», declera el a l'agentura da novitads Keystone-SDA.
Mez zercladur ston las pasturas ed ils pasturs da nursas esser pronts da manar ad alp ina muntanera da 600 fin 800 animals. Savens be cun agid da lur chauns.
Avant che partir pon las pasturas ed ils pasturs absolver ina scolaziun facultativa. Dapi l'onn 2009 vegnan coordinads ils curs dad «Agridea», il Center da cussegliaziun per agricultura e nutriment en Svizra.
La scolaziun naziunala per pasturas e pasturs vegn purschida a Visp en il Vallais ed al Plantahof a Landquart. «Las pretensiuns a lur lavur èn sa midadas fundamentalmain, entant ch'il cuntegn dals curs è restà pli u main il medem», declera Martina Schäfli, cussegliadra per tegnida da biestga manidla al center a Landquart.
Nova sfida pervia d'animals da rapina e turissem
«Pli baud pasculavan ils animals libramain sin la gronda part da las pradas alpinas. I na deva ni saivs ni chauns che pertgiran muntaneras», di Schäfli e renviescha a las sfidas dals animals da rapina gronds.
Ma era l'uman saja pli preschent en ils auts. «Sin l'alp entaup'ins oz bler dapli persunas», ha Jan Boner remartgà. Adina dapli viandants u ciclistas veglian perscrutar la cuntrada. «Ins sto esser pli attent e communitgar dapli», di el.
Ultra da quai mancan ils meds finanzials. «Pervia da midadas da persunal e scursanida dal preventiv per mesiras da protecziun da muntaneras n'ha Agridea betg pli meds suffizients per la coordinaziun», ha ditg Schäfli.
Pervia da midadas da persunal e scursanida dal preventiv per mesiras da protecziun da muntaneras n'ha Agridea betg pli meds suffizients per la coordinaziun
Sco reacziun sin quai cumenza il Plantahof a partir dal settember ina nova scolaziun per pasturas e pasturs en lingua tudestga. Insaquants moduls ch'èn vegnids instruids avant en differentas scolas han lieu ussa a Landquart.
Curs existent vegn restructurà e prolungà
Il curs consista da trais parts: enconuschientschas fundamentalas, praticums sin las alps ed instrucziun cun chauns da pastura. A la fin da la scolaziun ston las participantas ed ils participants far in examen. Sch'ellas han terminà cun success, survegnan ellas ed els in certificat.
Las parts ston vegnir absolvidas entaifer dus onns. La scolaziun cun ils chauns da pastura datti dapi 25 onns a Landquart e saja fitg populara. «Las 24 plazzas che nus avain a disposiziun èn quasi adina occupadas», di Martina Schäfli.
Sco finamira ha il curs er da dar perspectiva per il mastergn: «Nus vulain far curaschi, sch'insatgi decida da lavurar ad alp la stad ed er dar in zic luschezza, sch'insatgi è bun da cultivar muntaneras da tschients d'animals cun ses chauns», di Boner.