La Scola auta da pedagogia dal Grischun (SAPGR) ha fatg l'onn passà in pitschen gudogn. Tar entradas ed expensas da bun 26 milliuns francs serra quella il quint cun in plus da radund 23'000 francs. Quai malgrà che la scola aveva atgnamain quintà cun in minus.
Tenor la communicaziun saja il resultat positiv cunzunt da declerar cun il pli aut dumber da studentas e students l'onn 2023. Cumpareglià cun il 2022 hai dà 12% dapli studentas e students. En connex cun quest augment da studentas e students èn stadas las contribuziuns chantunalas e sur-chantunalas pli autas. Ils custs da persunal sajan dentant er creschids.
Giubileum da 20 onns – in onn da records
197 studentas e students han cumenzà il studi l'atun 2023 a la Scol'auta da pedagogia dal Grischun – uschè blers sco anc mai. Cun quai cuntinuescha a crescher il dumber da studentas e students novs tenor la communicaziun. Entaifer paucs onns haja dà in augment da 50%.
Avant 20 onns n'avess ins betg cartì ch'in tal svilup saja pussaivel.
Cun total 516 studentas e students ha la SAPGR per l'emprima giada era surpassà la limita da 500 persunas immatriculadas. Ella vala cun quai pia da nov sco scola auta da pedagogia mezgronda.
La SAPGR exista dapi ils 20 d'october 2003 – ella ha pia festivà 20 onns giubileum l'onn passà. En tut 59 persunas avevan cumenzà lur studi a Cuira lez onn.
