Gian-Paolo Curcio daventa nov rectur da la Scola auta spezialisada dal Grischun. Sco quai che la scola ha communitgà, surpiglia Curcio sia nova lavur il 1. da schaner 2025. El succeda a Jürg Kessler che va lura en pensiun. Curcio è actualmain rectur da la Scola auta da pedagogia dal Grischun.
«Las scolas autas han l’incumbensa da generar savida e da laschar circular quella savida. Uschia prestan ellas in servetsch impurtant per la societad e gidan a dumagnar las sfidas dal futur», vegn Curcio cità en la communicaziun. Ed el cumplettescha che la scienza, la perscrutaziun ed il svilup gioghian ina rolla centrala.
Per garantir ina buna surdada, vegn Gian-Paolo Curcio a cumenzar gia il 1. da november 2024 en la scola auta spezialisada. L'um da 47 onns è dapi il 2014 rectur da la Scola auta da pedagogia dal Grischun. Tgi che al suonda al timun da la scola n'è betg menziunà en la communicaziun.
