Il Centro Sanitario Bregaglia sporscha plazza per radond 40 persunas en la chasa d’attempads e da tgira. Sco emprima chasa per persunas attempadas en Svizra tgira ella attempadas ed attempads da l’Italia per in pretsch pli favuraivel che per ils pazients da la Svizra. Els pajan be 70 fin 80% da la tariffa cumplaina prescritta dal chantun. Uschia po il center evitar letgs fraids che chaschunan uschiglio be custs ma naginas entradas.
Emplenir letgs vids
Tenor il president da la cumissiun administrativa dal Centro Sanitario Bregaglia, Maurizio Michael, saja quai in experiment per garantir era en avegnir cifras nairas. La situaziun finanziala saja actualmain buna ed i na saja betg ina necessità da chattar entradas supplementaras. Tenor el bastia era in pretsch reducì pels clients talians per cuvernar ils custs che quels chaschunan. Pretendessan els 100% da la tariffa na vegniss nagin pli da l’Italia, uschia Maurizio Michael.
Mantegnair persunal ed il manaschi
Cun avair in’occupaziun constanta dals letgs possian els evitar fluctuaziuns da persunal ed era mantegnair la qualitad da lur spierta.
In punct datti dentant: Clients da l’Italia survegnan bain il medem tractament, ma els na dastgan betg restar pli ditg che var trais mais en Svizra. Plinavant hajan persunas da la Svizra adina prioritad, accentuescha Maurizio Michael.