Avant 7 onns ha la regenza da Cuira fatg in concept per la vegliadetgna. Uss sa mussa, che la situaziun è pli nauscha che spetgada: La suprastanza es ida da quai anor ch’ils custs per la tgira staziunara sa dubleschan fin l’onn 2035 sin 10 milliuns francs. Ditg general: En futur datti dapli persunas che dovran tgira, e pli paucas che pajan perquai.
Tar la tgira a lunga durada na vai betg be per persunas pli veglias, dentant per tut quellas che dovran sur pli lung temp sustegn e tgira. Tar quellas dovrian ins dapli purschidas, uschia il cusseglier da citad responsabel, Patrick Degiacomi, envers il schurnal regiunal da SRF.
Per persunas che n’èn anc betg en ina chasa d’attempads, ma che dovran tuttina tgira – per exempel cun demenza – essan nus davos en.
Dapli purschidas custan dentant dapli – e cun quai er dapli che prevesì atgnamain. Il problem principal, uschia il cusseglier da citad, saja dentant ch’ins na possia betg garantir la tgira. Adina pli savens survegnan be persunas cun grond basegn da sustegn ina plazza en ina chasa da tgira. Il squitsch sin la tgira a chasa s’augmenta pia. Persunas parentas ed enconuschents stoppian lura gidar.
Dapli persunal enstagl dapli chasas
Fin 2050 quintan ins che la cumpart da persunas che lavuran sa sbassan per 20%. Il medem mument datti adina dapli persunas veglias che dovran sustegn. Chattar quel equiliber è ina sfida, uschia Patrick Degiacomi.
Actualmain na quintan ins betg da fabritgar dapli chasas d’attempads. Suenter che la «generaziun dals Babyboomers» eran là, pudessan quellas esser vitas. Perquai veglian ins promover las raits da persunas e contacts. Il chantun planisescha da pajar a partir dal 2027 300 fin 600 francs per mais a persunas privatas chi tgiran lur confamigliars.
Adattà al tema
Ils «Cuntrasts» dattan in’invista en il mintgadi da la staziun palliativa da l’ospital chantunal ed accumpognan il servetsch da punt palliativ, in servetsch per las regiuns, in servetsch che pussibilitescha a persunas grev malsaunas da murir a chasa.