Il pli tard la fin d’october survegnan ins la brev cun la polissa da la cassa da malsauns. Quai è prescrit en la lescha, per ch’ins possa decider ad ura sch’ins vul midar tar in autra cassa.
L’onn che vegn, sa sbassan las premias per l’emprima giada dapi il 2008 puspè en media per 0,2%. Il motiv principal è che las cassas da malsauns duain reducir lur reservas.
Perquai che las cassas da malsauns han dapli reservas che prescrit ed han plinavant pudì far blers raps cun quellas sin il martgà da chapital, ha la politica intervegnì
In exempel concret
Era sche las premias en il 2022 sa sbassan en media, rendi da congualar las offertas, sco in exempel concret mussa:
La famiglia «Muster» (dus geniturs e dus uffants, 11 e 17 onns) ha in model da segiranza da standard, ina franschisa per persuna da 300 francs e vul midar da la pli chara cassa tar la pli bunmartgada en il chantun Grischun. Tar ils geniturs vegn la segiranza d’accidents laschada davent perquai ch’els èn assicurads tar il patrun.
Tenor quest exempel resulta or dal calculatur da premias dal Uffizi federal per sanadad (BAG), priminfo.ch, in potenzial da spargn da 810.40 CHF per mais tar la famiglia «Muster». Quai munta ad in spargn da bunamain 5'000 CHF l’onn.
Era sch'il quint è calculà cun exempels extrems, mussa il calculatur il potenzial avant maun. Ed era cun differentas franschisas, models da medis alternativs e quints annuals pon ins spargnar. Quellas ponderaziuns recumonda il BAG dentant da far avant ch’ins conguala las differentas cassas da malsauns. Impurtant è che la disditga riva tar la cassa da malsauns sin via postala ed il pli tard enfin ils 30 da november. Il BAG racumonda plinavant da trametter quella cun spediziun inscritta per ch’ins haja ina conferma da spediziun.
