Cun ils blers firads durant la primavaira datti era bler traffic envers il sid. Quai badan surtut las abitantas ed abitants da las regiuns pertutgadas enturn las vias da viadi. Pervi d'in augment da traffic da Pasca èsi era da spetgar bler traffic durant Tschuncaisma.
Il desideri da far il viadi en il sid, la fin d'emna prolungada da Tschuncaisma, è sco i para puspè fitg grond. Sin l'autostrada A13, la ruta da guntgida, è la colonna creschida ad in crescher la sonda ed enturn las trais il suentermezdi era ella 20 kilometers lunga, ha communitgà il TCS. Quai ha muntà 1 ura e 30 minutas dapli temp da viadi. Era avant il portal nord dal tunnel dal Gotthard è la colonna creschida a moda rasanta fin a 21 kilometers. Uschia han ils automobilists e las automobilistas duvrà radund 3 uras e 30 miutas pli ditg per il viadi. Il record d'enfin ussa per Tschuncaisma da 28 kilometers, ils onns 1999 e 2018, n'han ins dentant betg cuntantschì.
Dapli traffic durant Ascensiun e Tschuncaisma
Tenor Andreas Pöhl, da l'Uffizi da la construcziun bassa, hajan ins constatà durant ils ultims onns che la quantitad da traffic saja pli auta sur l'Ascensiun e Tschuncaisma che sur Pasca. Tuttina è la quantitad da traffic stada quest onn durant Pasca 20% pli auta che la media. Perquai vegn era spetgà dapli traffic durant ils ulteriurs dis.
Andreas Pöhl di, che l'experientscha mussia che quests moviments dal traffic durant ils firads da primavaira sajan pli independents da l'aura che quels da l'enviern.
Ins dovra pazienza
Là, nua ch'ins dovria en mintga cas blera pazienza saja enturn il tunnel dad Isla Bella, nua ch'i vegn spetgà gia baud stagnaziuns da traffic. Ed er en la regiun da Sargans, nua che l'A3 e l'A13 sa collieschan, èsi da spetgar bler traffic. Tenor Pöhl saja la raschun per quai ch'il chantun Grischun haja fatg dispositiv enturn il Pass da Son Gliezi, Fläsch e Mastrils, ma er enturn la regiun Bonaduz.
Era la Blue Line a Domat vegnia puspè activada, cura che la quantitad da traffic saja memia gronda, ma la collavuraziun tranter la vischnanca ed il chantun funcziunia fitg bain.
Supplementar recumonda Andreas Pöhl da viagiar ordaifer dals temps da grond traffic, quai saja u la damaun baud u bain tard la saira. Per persunas che lavuran durant ils dis da Tschuncaisma èsi da cussegliar da viagiar cun il traffic public sin binaris.
Or da l'archiv: