Cun ils blers firads durant la primavaira datti era bler traffic envers il sid. Quai badan surtut las abitantas ed abitants da las regiuns pertutgadas enturn las vias da viadi. Pervi d'in augment da traffic da Pasca èsi era da spetgar bler traffic durant l'Ascensiun.
Dapli traffic durant Ascensiun e Tschuncaisma
Tenor Andreas Pöhl, da l'Uffizi da la construcziun bassa, hajan ins constatà durant ils ultims onns che la quantitad da traffic saja pli auta sur l'Ascensiun e Tschuncaisma che sur Pasca. Tuttina è la quantitad da traffic stada quest onn durant Pasca 20% pli auta che la media. Perquai vegn era spetgà sur l'Ascensiun il medem, sche betg dapli traffic.
Era sche l'aura durant ils dis d'Ascensiun na guarda betg ora uschè amiaivla, spetga Andreas Pöhl bler traffic. El di, che l'experientscha mussia che quests moviments dal traffic durant ils firads da primavaira sajan pli independents da l'aura che quels da l'enviern.
Ins dovra pazienza
Là, nua ch'ins dovria en mintga cas blera pazienza saja enturn il tunnel dad Isla Bella, nua ch'i vegn spetgà gia baud stagnaziuns da traffic. Ed er en la regiun da Sargans, nua che l'A3 e l'A13 sa collieschan, èsi da spetgar bler traffic. Tenor Pöhl saja la raschun per quai ch'il chantun Grischun haja fatg dispositiv enturn il Pass da Son Gliezi, Fläsch e Mastrils, ma er enturn la regiun Bonaduz.
L'augment da traffic vegnia gia spetgà la mesemna enturn mezdi fin la saira e gievgia la damaun a las 08:00. Per il return saja da quintar cun dapli traffic surtut la dumengia, ma cunzunt la saira, quai dependia da l'aura en il sid.
Era la Blue Line a Domat vegnia puspè activada, cura che la quantitad da traffic saja memia gronda, ma la collavuraziun tranter la vischnanca ed il chantun funcziunia fitg bain.
Supplementar recumonda Andreas Pöhl da viagiar ordaifer dals temps da grond traffic, quai saja u la damaun baud u bain tard la saira. Per persunas che lavuran durant ils dis d'Ascensiun èsi da cussegliar da viagiar cun il traffic public sin binaris.
Or da l'archiv: