La marca «graubünden» cun ses secretariat vegn en novs mauns, quai ha decidì la regenza grischuna. A partir dal 2027 procura la firma communicaziun.ch da Glion la gestiun, sco il chantun scriva.
En ils tschintg onns dal mandat stattan a disposiziun mintg'onn maximalmain var 600'000 francs.
Avant dus onns aveva il Grischun laschà evaluar il secretariat da la marca «Grischun». Per motivs dal dretg d'acquisiziun è la gestiun dal secretariat lura vegnida publitgada uffizialmain e quatter interpresas han inoltrà in'offerta.
graubünden – dapi 23 onns ina marca dal lieu
L'onn 2003 è la marca «graubünden» vegnida lantschada sco marca dal lieu per il Grischun. L'onn 2013 han ins lura cumenzà ad orientar la marca a l'idea d'ina «metropola natirala» ed a la reorganisar ordaifer Grischun Vacanzas. Sin basa da quai è vegnì examinà il management da la marca.
Il mandat per la gestiun dal secretariat è vegnì surdà l'onn 2017 a la firma Clerezza ScRL respectivamain Quant SA a Flem, sut la direcziun da Gieri Spescha. Il mandat è vegnì prolungà per ils onns 2020 fin 2022 sco er per 2023 fin 2025 respectivamain 2026. Durant ils ultims 10 onns ha il mandatari vertent manà la marca «graubünden» sco er influenzà la strategia.
Il mainagestiun actual, Gieri Spescha, è quasi il «bab» da la marca. I fa schon mal da dar giu in da ses uffants che saja purtant creschì, dentant saja er da guardar enavant. Natiralmain saja el dischillus da stuair dar giu il mandat. I saja d'acceptar la decisiun ed ussa stoppian ins guardar enavant. Forsa saja ussa era in bun mument per surdar in da ses «uffants» en novs mauns.
La vita va enavant. I dat novas sfidas, novas schanzas e novas pussaivladads. Nua ch'ina porta sa serra, s'avra in'autra.
Il cusseglier guvernativ responsabel, Marcus Caduff, di ch'el haja chapientscha che Gieri Spescha saja dischillus. El haja manà quella marca cun fitg grond success. I saja dentant adina stà cler ch'ins na vul betg in automatissem ch'il mandat da gestiunari e manar la marca giaja automaticamain enavant. L'offerta dal nov gestiun communicaziun.ch haja simplamain persvadì.
Jau na spetg da la nova gestiun betg ina revoluziun, mabain in'evoluziun. Ch'ins fetschia vinavant sin il fundament fin ussa fitg stabil. Ch'ins sviluppeschia vinavant la marca sin quest fundament.
Or da l'archiv: