Siglir tar il cuntegn

Header

audio
Paucs controlladers, malgrad blers che fan curs
Or da Actualitad dals 18.08.2021.
laschar ir. Durada: 02:20 minutas.
cuntegn

Controlla da bulieus Adina pli paucs controlladers, malgrà curs da scolaziun occupads

Blers vulan far la scolaziun sco controllader da bulieus, dentant be paucs era la lavur. Tenor l’uniun da controlladers da bulieus hajan blers retegnientschas da surprender questa gronda responsabladad envers ils rimnaders.

Cura che l’uniun da controlladers da bulieus svizra metta online ils curs per la scolaziun sco controllader e controlladra da bulieus na giaja betg ditg, fin che tut ils plazs sajan occupads. L’interess vid ils bulieus saja grond, declera la presidenta da la partiziun Svizra tudestga Eva Grosjean-Sommer. Quest onn sajan 26 persunas s’annunziadas per ils examens. Ma tuttina vegnia a dar paucs che surprendian silsuenter questa incumbensa en ina vischnanca.

Grondas stentas

I dettia plirs motivs daco che blers desistian da questa incumbensa, di Eva Grosjean-Sommer. En emprima lingia saja la responsabladad fitg gronda, cunzunt persunas ch’han gist finì la scolaziun hajan anc grondas retegnientschas. Vinavant èsi d’investir durant la stagiun da bulieus bler temp. Per exempel èsi da star a disposiziun durant in tschert temp per emna als rimnaders che portan sperasvi ils bulieus. Sco davos punct menziuna la presidenta che la paja na saja betg optimala.

Mancanza en la periferia

En las citads dettia avunda posts da controlla. Ora en las regiuns percunter betg. Uschia era en il Grischun. Pli perifera che la regiun è, e pli lunsch ch'igl è dad ir sch’in vul laschar controllar ils bulieus. Quai na saja betg optimal perquai che la schanza d’ina intoxicaziun creschia sche las persunas na laschian betg testar ils bulieus damai ch’il proxim post da controlla è memia lunsch davent.

Nua chat jau il proxim post da controlla?

Avrir la box Serrar la box

Sin la pagina d'internet da l'uniun da controlladers da bulieus èsi da chattar nua ch'il proxim post da controlla en Voss conturn sa chatta:

https://www.vapko.ch/index.php/de/eine-pilzkontrollstelle-finden

RTR actualitad 07:00

Artitgels legids il pli savens

Scrollar a sanestra Scrollar a dretga