Per la tschintgavla giada porscha la manadra d'ina scola da jodlar Seraina Hartmann in curs per laics a Cuira. Durant quest curs s'inscuntran las participantas ed ils participants mintgamai quatter sairas per ina ura e mez en la sala «Sinnhof», che sa chatta sin l'areal da l'anteriura praschun Sennhof.
Questa saira èn vegnidas ensemen 26 persunas, che stattan en in rudè ed exerciteschan differentas modas da jodlar.
Tras quai ch'ils participants s'inscuntran per la terza giada, han ellas gia emprendì intginas tecnicas e chanzuns sut la batgetta da Seraina Hartmann.
Quest in'ura e mesa passa uschè spert, e quai vul dir tut – a mai plascha quai fitg!
Ella è creschida si a Cuira e ha fatg in studi da musica a Lucerna. Sco ella raquinta, saja ella s'inamurada en il jodlar cun var 20 onns cura ch'ella haja udì in jodel natiral da l'Appenzell durant ina festa da jodlar a Cuira.
Jodlar è uschè bel per il cor!
Dapi passa dus decennis dat ella vinavant sia savida en differents curs. Durant quest curs qua accumpogna ella las participantas ed ils participants cun in clavazin, e sper il diriger datti er qua e là ina sgnocca.
Sch'ins lascha ir il tschitschapulvra a chasa durant exercitar, è ins tras questa ramur dasperas bler pli curaschus da jodlar dad aut.
Emprendì vegnan differentas chanzuns e modas da jodlar, ils participants han per quai a disposiziun in carnet da notas. Er in ni l'auter tric per far exercizis a chasa vegn dà vinavant.
Tenor Seraina Hartmann possia atgnamain mintgin emprender a jodlar, per ils curs na saja er nagina premissa da pudair leger notas. Ella e dal opiniun, ch'ils carstgauns duain insumma chantar dapli, e betg sco ultim pervia da quai porscha ella a partir dals 9 da matg mintga mais in'occurrenza en la citad da Cuira sin la plazza dal Sennhof, nua che tuttas e tuts èn simplamain envidads da vegnir ensemen e jodlar.