Ils kinos cun lunga tradiziun en la citad da Cuira (Kinocenter en la via dal teater e Kino Apollo en la via Badus da manaivel da la staziun) na mussan a partir dal matg betg pli regularmain films. Quai ha annunzià la famiglia possessura Kalberer. En ina communicaziun a las medias menziuna quella sco raschuns ils effects dal temp da corona, ils pretschs d'energia e ch'il maun public na sustegnia betg ils kinos finanzialmain.
Dal tut na serran ils kinos però betg lur portas. Er sch'il program cun films mintga di vegn stritgà, vegnan vinavant mussadas operas sco p. ex. quella da la Metropolitan Opera a New York. Er programs spezials sco il «Arthouse» cun films pli profunds tar tematicas actualas e cuntraversas da l'entir mund u era occurrenzas per firmas, instituziuns e persunas privatas restan.
In grev pass
Sco ils fragliuns Markus e Rita Kalberer scrivan saja quai stà in fitg grev pass per els da stritgar il program quotidian. La finala haja la famiglia contribuì a la vita culturala da la citad dapi il 1956. Ma la situaziun lubeschia be questa schliaziun.
Er il visitaders dal kino che RTR ha inscuntrà avant il kino sur ils dis da Pasca deploreschan che quel sto serrar. L'atmosfera famigliara ed il lieu sajan fitg agreabels manegian els envers RTR.
Atgnamain èsi donn, ins era amez la citad ed ha pudì ir spontanamain a kino.
Ils kinos da la famiglia Kalberer eran sa dustads adumbatten cunter il nov center da kinos a l'ur da Cuira ch'è avert dapi dus onns e mez.
Jau chat tragic che ins sto adina serrar tut.