Il faschissem ed il naziunalsocialissem en il Grischun
Il Grischun duai lavurar si l'istorgia dal faschissem e dal naziunalsocialissem en il chantun. Quai pretenda in'incumbensa ch'il deputà Tino Schneider da l'Allianza dal Center ha inoltrà. La debatta enturn il monument en il santeri Daleu a Cuira per schuldads tudestgs morts en l'Emprima Guerra Mundiala, haja mussà il basegn. Surtut mussia questa debatta che surtut il temp enturn il cumenzament da la Segunda Guerra Mundiala na saja mai vegnì perscrutà sistematicamain en il Grischun. Quai saja da midar, era cun perscrutar l'istorgia da las unfrendas ed auters pertutgads.
Integrar cun conceder il dretg da votar ad esters
La regenza grischuna duai preparar d'introducir il dretg da votar ed eleger chantunal, per persunas da l'ester che vivan en Svizra. La cumpart dad esters en il Grischun muntia a 19%. Uschia na sajan passa 38'000 persunas betg integradas politicamain en la societad grischuna, argumentescha il deputà Simon Rageth da la Partida verd-liberala. E 9% da questas persunas da l'exteriur hajan schizunt il dretg da dimora en il Grischun. Il Grischun fiss il terz chantun sper Neuchâtel ed il Giura, nua che persunas da l'ester pudessan votar ed eleger sin nivel chantunal. Dentant quels na dastgassan betg vegnir elegids, sco il deputà Rageth scriva en sia incumbensa inoltrada.
En tut hai dà 32 incumbensas or da la sessiun dal favrer 2023. Tranter auter pertutgan quellas temas sco la mobilitad, la promoziun da cultura u l'avegnir da butias dal vitg.
