Il suveran da San Murezzan na vul nagin dretg da vuschar per persunas estras. Quai han votantas e votants decis la dumengia a l'urna, cun duas terzas da las vuschs: 925 han vuschà cun Na, 471 han ditg Gea. La participaziun a la votaziun ha muntà a passa 55%.
Uschia na pon persunas estras cun permissiun da dimora C vinavant betg decider automaticamain davart fatschentas communalas. Survegnir il dretg da votar funcziuna per persunas estras vinavant be sur la natiralisaziun, pia cun daventar Svizzer u Svizra.
Il president communal Christian Jott Jenny n'ha betg vulì discurrer d'in di nair per San Murezzan – dentant d'in di stgir grisch cun plievgia ed in zic tschajera.
I fiss stà ina schanza per questa vischnanca averta envers il mund – d'agiuntar a quest maletg in tschertg cuntegn.
Surprais, na dal resultat ma da la decisiun uschè clera – è stà Gian Marco Tomaschett, cusseglier communal da la PPS ed adversari dal dretg da vuschar per esters. In resultat stretg fiss tenor el stà difficil per omaduas varts. I mussia cler en tge direcziun che la via duai manar, e San Murezzan haja mussà quai.
Ils arguments avant la votaziun
A San Murezzan vivian e lavurian bleras persunas da l'ester ed adina dapliras dad ellas s'identifitgeschian cun la vischnanca e s'engaschian en numerus secturs, argumentescha la suprastanza communala. Ils adversaris fan attent sin il dretg da burgais: Tgi che veglia vuschar en vischnanca duai far quai cun ir la via da natiralisaziun.
I va per 785 persunas che pon da nov votar ed eleger a San Murezzan ed era vegnir elegidas en gremis communals. Il dumber da votantas e votants s'augmenta uschia sin 3360 persunas – 23,4% da quellas fissan persunas estras. Quai tenor calculaziuns da la vischnanca.
Situaziun en il Grischun
Il Grischun n'enconuscha betg il dretg da vuschar per persunas da l'exteriur – il chantun lascha dentant liber a las vischnancas d'introducir quel. San Murezzan che ha uss ditg Na – fiss stada la 24avla vischnanca en il Grischun cun il dretg da vuschar per esters.