Il Cussegl grond ha cumenzà il mardi suentermezdi cun la debatta enturn la lescha da tgira. Mesemna suentermezdi ha el terminà la debatta cun la decisiun d'investir dapli.
Il suveran svizzer ha ditg il 2021 cleramain Gea a l'iniziativa da tgira, in'iniziativa che pretenda da Confederaziun e chantuns che la tgira vegnia renconuschida e promovida pli fitg. Cun la revisiun parziala da la lescha chantunala per promover la tgira da persunas malsaunas e l'assistenza da persunas attempadas e da persunas che basegnan tgira (lescha da tgira) realisescha il chantun uss quai che l'iniziativa pretenda.
Dapli daners per scolaziun
Tranter auter datti dapli daners per instituziuns che porschan la scolaziun pratica da persunal da tgira ed i dat er dar dapli paja e dapli sustegn per persunas che absolveschan ina scolaziun tar scolas spezialisadas superiuras (HF) u er tar scolas autas spezialisadas (FH). La Confederaziun surpiglia fin 50% dals custs. Tut en tut quintan Confederaziun e chantuns che l'offensiva da scolaziun vegnia promovida durant otg onns cun radund ina milliarda francs.
Il chantun sustegna, auter che la Confederaziun, er l'emprendissadi da spezialista e spezialist da sanadad. Quai cun pajar contribuziuns a las instituziuns da sanadad che porschan l'emprendissadi. Uschia duai dar avunda plazzas per l'emprendissadi. Quai era il punct dispitaivel vi da l'entira revisiun: tar quel n'era la cumissiun ch'ha preparà la fatschenta betg perina. Ina part vuleva dar quai sustegn finanzial, tschella part betg. La finala ha la maioritad dentant decidì da pajar quest sustegn per l'emprendissadi che munta a 1'800 francs per onn e persuna che fa l'emprendissadi.
