In president per tut ils Rumantschs
Avant trais onns è Johannes Flury succedì a Duri Bezzola sco president da la Lia Rumantscha. L'um dal Partenz che ha uss 69 onns aveva gia ditg lura ch'el surlaschia gugent quest post ad in Rumantsch u ad ina Rumantscha, sch'ì dess ina tala candidatura.
Oravant tut il president da la Societad Retorumantscha, Cristian Collenberg, aveva crititgà che Flury saja il sulet candidat. Sia proposta da spustar l'elecziun per tschertgar ulteriuras persunas che stessan a disposiziun per ina elecziun è dentant vegnida refusada da la radunanza da delegads avant trais onns. Ed era questa giada na datti probablamain betg cuntercandidats.
Ch'ins n'ha chattà suenter trais onns nagin candidat ha crai jau da far ch'ins n'è betg ì a tschertgar.
Numnà trais finamiras concretas
Suenter sia elecziun ha Johannes Flury punctuà ch'el vuless esser in president per tut ils Rumantschs. Las finamiras ch'el ha annunzià suenter sia elecziun sco president da la Lia Rumantscha l'onn 2015 eran:
- Midar las structuras da la Lia Rumantscha
- La scola: Ils meds, ma era il Plan d'instrucziun 21
- La diaspora
L' emprima finamira, midar las structuras, haja la suprastanza vulì midar cun ina nova proposta, ha ditg Flury. A la radunanza da delegads a Lavin saja questa proposta vegnida refusada. Quai saja stada ina decisiun democratica e la suprastanza n'haja perquai betg pli fatg ponderaziuns da midar insatge vid las structuras.
Pertutgant la scola ha ditg Flury en il studio dal radio rumantsch, ch'il cumbat cunter l'iniziativa per be pli ina lingua estra en scola primara saja stà in success. Ed er en la sessiun actuala dal Cussegl grond haja il parlament dà suatientscha a dus giavischs da la Lia Rumantscha, quai en connex cun las scolas medias rumantschas.
La terza finamira, quella davart la diaspora, na saja anc betg cuntanschida. Intgins incaps hajan impedì dad ir vidlonder en endretg vid questa finamira. Tranter auter hajan els gì da tschertgar in nov secretari general suenter la demissiun da Urs Cadruvi. Lura haja l'entira discussiun davart las medias rumantschas surprendì la Lia. A Mustér, a la radunanza da delegads, n'hajan ins pensà gnanca zic vid quai, uschia Flury. I dettia plans, i manchian il mument ils meds per realisar quests plans.
Flury e la limita da vegliadetgna
Per il presidi da la LR vala, ch'in candidat u ina candidata na dastga betg esser sur 70 onns veglia. Uschia èsi cler che Flury fa anc ina perioda d'uffizi sch'el vegn elegì. En trais onns èsi pia da tschertgar ina successiun.
Tschertgar in successur u ina successur per il presidi da la Lia Rumantscha, n'è betg la chaussa da la suprastanza, mabain da las uniuns affiliadas.
Per Johannes Flury fissi flot, ed el spera er, ch'i dettia en trais onns ina dunna che candideschia per il presidi. Quai fiss l'emprima dunna en l'istorgia da la Lia che diregia l'uniun tetgala da la Svizra Rumantscha.
