Tut las trais interpresas grischunas che RTR ha dumandà n'avessan betg fatg quint cun dazis da 39% sin products svizzers che vegnan exportads en ils Stadis Unids. Dus dis avant che quels duessan ir en vigur èn ils schefs e scheffas schoccadas.
La Conditoria a Sedrun
La Conditoria viva sper il martgà svizzer surtut era da l’export da lur turtinas – quai en 13 pajais. Ed il focus è – sper Dubai – era sin ils Stadis Unids. Cura che Reto Schmid, il mainafatschenta, ha udì dals dazis ha el cumenzà a far il quint per sia fatschenta. Ses resultat: Quai na sa lascha betg supportar.
Dapi l’onn passà èn els vi d'elavurar in grond project en ils Stadis Unids – numnadamain ch’ils products sursilvans pon vegnir vendids tar las butias da Costco, in dals pli gronds detaglists dal mund. Atras ils novs dazis pudess quest project dentant ir da l’aua giu. Perquai spera Reto Schmid sin gievgia e che la Svizra chattia ina schliaziun cun ils Stadis Unids.
Truffer SA a Val
La fatschenta da famiglia explotescha ed elavura crap da quarzit. La cun-possessura Pia Truffer è stada stutta cura ch’ella ha udì la novitad. Ella avess fatg quint tranter 15 e 20% dazis. 39% èn ina surpraisa negativa, manegia ella. Pia Truffer pensa che quai n'è anc betg l’ultim chapitel ch’è vegnì scrit. Ella spetga sin tractativas politicas.
CEDES SA a Landquart
La CEDES SA producescha tranter auter sensurs per ascensurs e portas ed exportescha quels en tut il mund. Cura ch’il president dal cussegl d’administraziun, Christian Thöny, ha udì dals dazis da 39% ha el sco emprim pensà che quai saja bizar ed irraziunal. Uss, sin in segund sguard, interpretescha el quai sco tactica.
Il principi da tractativas da Trump è da dar in pugn en fatscha e suenter guardar co ch’el survegn il meglier resultat. Quai n'è betg agreabel per nus però ina tactica clera ed evidenta.
Questa tactica na funcziunia tenor Christian Thöny dentant betg a lunga vista.
Per il mument hai num per la CEDES SA a Landquart, da minimar ils donns. Quai vul dir d’evitar d’exportar da la Svizra ed exportar sche pussaivel dad auters lieus da producziun. China na saja betg ina buna schliaziun perquai che quels han era auts dazis. Dentant è il lieu a Rumenia ina schliaziun. Quel lieu sa chatta en l'Uniun europeica ed ha da pajar dazis da 15%. Ed era Christian Thöny spera ch’il Cussegl federal cuntanschia in meglier resultat – forsa anc meglier che l'UE.