Che famiglias e persunas spezialisadas duain vegnir distgargiadas fiscalmain, gliez n'è betg stà dispitaivel – en dumonda è però stà il co e cum. Cunzunt la sanestra ha admonì che persunas bainstantas profiteschian da deducziuns, fertant che persunas cun bassas entradas vegnian a la curta.
Dentant er las consequenzas per las vischnancas èn vegnidas tematisadas; gea la situaziun finanziala dal chantun saja en il mument buna, quai na valia però betg per tuttas vischnancas. En consequenza stoppian ins esser attent tar tuttas adattaziuns vid la taglia.
Regenza duai sclerir levgiaments da taglia
Malgrà quels votums or dal parlament è l'incumbensa inoltrada dal deputà Oliver Hohl (PLD) a la fin vegnida surdada cun 86 cunter 27 vuschs a la regenza. Quella è uss obligada da suttametter al Cussegl grond in project concret co quellas persunas duain vegnir distgargiadas. Per exempel entras examinar las deducziuns per uffants, las deducziuns dals custs per la tgira d'uffants u er cun analisar la progressiun fiscala.
