La populaziun grischuna crescha levet. La fin da december da l'onn passà vivevan 202'538 persunas en il chantun. Quai èn 1'162 persunas dapli che l'entschatta da l'onn, sco l'uffizi per economia scriva.
La raschun principala per l'augment è vinavant la migraziun. La fin da december eran bun 20% da la populaziun grischuna persunas da l'exteriur. Cumpareglià cun ils auters chantuns è la populaziun grischuna creschida sut la media.
Il pli grond augment hai dà en la regiun Moesa Viamala, Landquart e Partenz. La pli gronda reducziun en las regiuns Alvra e Malögia.
In sguard sin las 15 vischnancas cun dapli che 3'000 abitantas ed abitants mussa, che las vischnancas dad Ilanz/Glion, Maiavilla e Trimmis èn creschidas procentualmain il pli fitg. Entaifer la gruppa da las pli grondas vischnancas grischunas han Arosa, Scuol, San Murezzan, Domat e Panaduz nudà ina reducziun da la populaziun.
Dapli mortoris
Plinavant èn vegnids registrads marcantamain dapli mortoris, cumpareglià cun ils onns avant. Sulet en la regiun Imboden e Landquart hai dà dapli naschientschas che mortoris. Cuntrari a la regiun Surselva – là è vegnida nudada la pli gronda bilantscha negativa.
Las cifras mussan era che dapli Grischunas e Grischuns han bandunà l'onn passà il chantun che quai che persunas èn vegnidas dad auters chantuns a star en il Grischun. Il pli savens emigreschan giuvnas Grischunas e giuvens Grischuns en scolaziun sco er persunas en giuvens onns da professiun. La pli gronda part da l'immigraziun interchantunala en il Grischun resulta da l'autra vart da las gruppas da la populaziun enturn la vegliadetgna da pensiunament.
Pli paucs Portugais, ma dapli Tudestgs, Talians e Rumens
La fin da l'onn 2022 stevan 39'852 persunas cun be in pass ester en il Grischun. Quai èn 996 dapli che l'onn avant. Il dumber da Portugais è sa reducì levet, persuenter è il dumber da Tudestgs, Talians ed Rumens s'augmentà. 440 persunas han survegnì il pass svizzer.
