Diversitad munta en emprima lingia variaziun da persunas: Saja quai um e dunna, differentas derivanzas, differentas religiuns, differentas linguas, differentas orientaziuns sexualas ubain era persunas cun differents handicaps. Diversitad è dapli che be mo l'egualisaziun tranter um e dunna e tuttina, quai è cler. E tuttina ha quella tematica era dominà la discussiun da podium. Il tenor era tar tuttas e tuts sin la tribuna ansasez il medem. Detg curt: La diversitad – spezialmain l’egualitad tranter um e dunna – quella saja en il Grischun sin buna via e tuttina dovri anc fitg bler.
Tenor Susanna Mazzetta, ina da las manadras dal project Diversity gr, vesins che adina dapli umens surpiglian dapli lavur per guardar dals uffants. E tuttina: Per Susanna Mazzetta giaja quai process bler memia plaun.
Grad quai che pertutga l’egualitad dad um e dunna – sa movi qua tar nus. E tuttina hai mintgatant il sentiment ch'i giaja uschè plaun.
Il fenomen dal retard alpin
Cun quai sentiment n'è Susanna Mazzetta betg persula. Era da vuschs ord il public, ch’en stadas presentas, aud’ins il medem: En las citads dettia dapli svilup quai che pertutga diversitad che qua tar nus en il Grischun. Ins stoppia propi guardar da dar gas.
A Turitg èn ins in per pass ordavant. En il Grischun sto quai anc vegnir pli conscient a blers.
«Alpine Retardierung», pia in retard alpin – uschia numna Jon Pult, cusseglier naziunal da la PS, quai fenomen cun in surrir. Schegea ch'i tuna plitost negativ haja quai fenomen – da quai retard alpin – era ses avantatgs.
Alpine Retardierung munta che tscherts svilups van en in conturn alpin simplamain pli ditg ch’en lieus pli urbans. En fasas da progress po quai avair ina influenza negativa. Dentant en fasas da regress, sco nus vesain uss en America, èn ins forsa leds sche betg tut va uschè spert.
Promover diversitad tar interpresas pitschnas
Sper l'influenza da la politica mundiala – è tranter auter è vegnì discussiunà co interpresas pitschnas pon insumma promover ed era profitar da diversitad, pia da quella variaziun da persunas, en lur interpresas. E qua è il crutsch: Era sche tschertas interpresas vulessan forsa gugent, dentant propi viver la diversitad quai è magari gnanc uschè simpel. Saja quai ord motivs logistics, finanzials u era ch'i na dat simplamain naginas annunzias. E qua less diversity gr tanscher il maun. Instruments dettia numnadamain, per exempel: Esser transparent quai che pertutga communicaziun, munta era cun la paja. Vesair la persuna sco tala cun tut quai che fatschenta ella per il mument. Saja quai uffants, hobbies. Ensacuras vegn forsa era il mument nua che insatgi sto u less tgirar in confamigliar.
Resguardar las fasas da veta da collavuraturas e collavuraturs. Ch’ins dir: uss poss ti lavurar in zic pli pauc e persuenter lavuras insacura auter in zic dapli.
Quella saira da discussiun ha puspè mussà: Il Grischun è dal reminent sin buna via quai che pertutga viver diversitad en las interpresas grischunas, schegea che la via è anc lunga è la finamira para anc lunsch davent. E tuttina, impurtant è ch’ins restia en il dialog.