Actualmain lavuran sper las derschadras usitadas er trais derschaders extraordinaris a las dretgiras dal Grischun. Quai per dar dumogn al culm da pendenza. La finamira fiss che quel è liquidà avant che las duas dretgiras – l'administrativa e chantunala vegnan sut in tetg a la Dretgira superiura.
Dapi l'onn passà hajan ins pudì sminuir las pendenzas da passa 400 sin sut 300 pendenzas, ha ditg Remo Cavegn, president da la dretgira envers RTR.
Start cun 12 derschadras e derschaders
Il 2025 cumenza la Dretgira superiura sia lavur e quai cun in derschader dapli, en tut cun 12 plazzas cumplainas. Il Cussegl grond è cun questa decisiun suandà a la proposta da la Cumissiun da giustia e segirtad. Il president da la dretgira Remo Cavegn avess giavischà duas plazzas cumplainas dapli per dar dumogn a la lavur. Pertge er tar las dretgiras regiunalas vesa el grondas sfidas.
Nus constatain che las dretgiras regiunalas èn per part dotadas cun pauc persunal. Quai cumbinà cun cas cumplex po dar stretgas.
Er Julia Müller da la cumissiun che surveglia las dretgiras conceda ch'i dovra adina puspè midadas ed er ch'i dat per part problems da dar dumogn a la lavur tar las dretgiras regiunalas.
Igl è indiscutabel ch'i dovra adattaziuns a las dretgiras regiunalas. Perquai hai er dà in'analisa da la situaziun. Cura che nus avain quest rapport pudain nus guardar tge pass ch'i dovra.
Sco proxim stattan sin il program en la sessiun dal december las elecziuns dals derschaders e las derschadras da la nova Dretgira superiura. Quella cumenza sia lavur il schaner 2025.
