L'Uffizi da construcziun bassa ch'era dachasa en il bajetg statal amez Cuira en la Grabenstrasse ha gia stuì far plaz. Quai suenter ch'il Cussegl grond ed il suveran han dà l'onn passà glisch verda al credit da 29,2 milliuns francs per sanar ed engrondir il bajetg gist visavi il Parc Fontana. 16 milliuns francs avess il chantun uschè u uschia stuì investir per sanar il bajetg ch'è vegnì construì ils onns 1877/1878. Glindesdi è stada l'emprima badigliada, in zic en il zuppà da la vart davostiers. Là nua che l'edifizi annex vegn construì per pudair porscher dapli plaz a collavuraturas e collavuraturs da la nova Dretgira superiura.
Il bajetg statal è in bajetg istoric, igl è numnadamain l'emprim bajetg ch'è vegnì construì aposta per l'administraziun chantunala. Perquai pudessi senz'auter esser ch'ina u l'autra surpraisa pudess vegnir a la glisch, quai manegia Carmelia Maissen, la cussegliera guvernativa responsabla.
Ch'i dat surpraisas tutga tar la lavur cun bajetgs existents. Jau sper dentant ch'i saja supraisas ch'ins dumogna e che na cumplitgeschan betg la construcziun e n'auzan cunzunt betg ils custs.
Dapli plaz dovri perquai ch'il suveran ha er decidì l'onn passà da refurmar la giustia ed uschia fusiunar las duas dretgiras actualas ad ina superiura. Quellas duain vegnir sut in tetg e duain en il futur er collavurar pli stretg e quai vegn simplifitgà cun esser en il medem bajetg.
En il decurs dal 2025 duai la sanaziun e l'engrondiment lura esser a fin per che la nova Dretgira superiura po lura sa chasar en il nov dachasa communabel.
