Ruth Nieffer è responsabla per il project Promo Femina. Cifras concretas, quantas dunnas che èn s'engaschadas en la politica grazia al project, na possian ins anc betg dar. In cas concret datti però: Il «Frauenstamm Lai» aveva tras la lavur da Promo Femina chattà ina dunna ch'ha candidà per l'uffizi da presidenta da la dretgira regiunala.
Cun il sustegn d'autras dunnas che han fatg reclama per la candidata è ella vegnida elegida ed è ussa dapi quest onn en uffizi. Quai saja in success, manegia Ruth Nieffer.
Occupar mesadad dals posts cun dunnas
La finamira dal project è d'avair in di ina quota da 50% dunnas en ils uffizis communals. Per far pli visibel che quai n'è anc betg il cas, han ils responsabels dal project mess ensemen ina charta geografica ensemen cun ils chantuns e las vischnancas participantas. Ina charta, nua ch'ins vesa la quota da dunnas da las singulas vischnancas. Plinavant datti occurrenzas da rait per porscher il barat tranter persunas en uffizi e dunnas che s'interesseschan per in uffizi.
Il potenzial per dunnas en la politica saja anc grond en il Grischun. Tuttina saja il svilup dals ultims onns positiv, quai che era las cifras da la corporaziun da vischnancas dal Grischun mussian.