Il mars 2023 ha il chantun Grischun nudà 1'019 persunas senza lavur, sco il chantun scriva. Quai munta ina quota da dischoccupaziun da 0,9%. Cumpareglià cun il mais avant, cun 1'152 dischoccupads e dischoccupadas, è il dumber sa sminuì. La davosa giada è la quota stada sut 1% il settember da l'onn passà.
Da las 1'019 persunas dischoccupadas eran 380 dunnas e 639 umens. Las cifras las pli autas da dischoccupaziun ha nudà la gastronomia (223), suandà da la branscha da construcziun (193). Sco gia il favrer ha il chantun nudà 41 persunas ch'èn dischoccupadas a lunga durada.
En Svizra è il dumber da persunas dischoccupadas sa reducì da 98'452 persunas sin 92'755 persunas. La quota da dischoccupaziun munta en Svizra a 2%.
Lavur curta en Grischun
Il mars 2023 eran 117 interpresas annunziadas per survegnir indemnisaziuns da lavur curta. Cumpareglià cun il mais avant (95 interpresas) è il dumber s'augmentà lev. Questa cifra na lubescha dentant naginas conclusiuns exactas davart il dumber effectiv d'interpresas che retiran lavur curta. Quels han numnadamain mintgamai trais mais peda d'annunziar, quanta lavur curta ch'igl han effectivamain gì.
Or da l'archiv:
