«Sustegnan las activitads da las organisaziuns linguisticas – en quest cas da la Lia Rumantscha e da la Pro Grigioni Italiano – a lunga vista la cultura rumantscha e taliana?», è la dumonda centrala dal studi actual da la Scola auta spezialisada dal Grischun. In team da project s'occupa da quella, Curdin Derungs è il manader.
Tenor el saja sa midà bler ils davos 20 onns en la promoziun linguistica. La digitalisaziun saja uss bler pli impurtanta che lura. Quai midia las pussaivladads da promover la lingua e la cultura entir ed entratg.
Uschia saja fitg impurtant d'evaluar da nov per tge ch'ils meds finanzials sajan vegnids duvrads e per tge ch'i fetschia senn da spender ils proxims onns. Cun ils resultats dal studi vul ins era preparar ina strategia per la proxima perioda da promoziun dals onns 2029 fin 2032.
Ina finamira è segir d'evaluar tge ch'è vegnì fatg cun quellas finanzas ch'ins ha survegnì da la Confederaziun.
Impurtont saja dentant da savair: Tar quest studi giaja mo per las contribuziuns federalas, betg per las chantunalas. I dettia era puncts che na sajan betg part dal studi, sco Curdin Derungs di: Ses team na saja betg la controlla da finanzas da la Confederaziun.
Era las medias rumantschas u talianas na sajan betg integradas en il studi. Il focus giaschia sin ils effects da las organisaziuns linguisticas e betg sin l'organisaziun da quellas.
Cumponentas dal studi
Il team da project sut la batgetta da Curdin Derungs haja l'emprim analisà divers documents existents sco documentaziuns, cunvegnas da prestaziuns u rapports interns da las duas organisaziuns linguisticas, la Lia Rumantscha e la Pro Grigioni Italiano. Igl haja era dà intervistas en gruppas cun persunas internas ed expertas ed experts dal rumantsch e dal talian – persunas da la scienza, da la cultura, d'uniuns u da las medias.
-
Bild 1 von 1. Curdin Derungs è il manader dal studi «Evaluaziun da la promoziun da linguas en il Grischun» da la Scola auta spezialisada dal Grischun – sin incumbensa da l'Uffizi federal da cultura. Bildquelle: Mess a disposiziun.
E per il mument possia la populaziun emplenir in questiunari online fin a la fin dal mais. Co vesia ed evalueschia la populaziun las activitads da las duas organisaziuns linguisticas – da quai vegl'ins survegnir in maletg uschè cumplessiv sco pussaivel cun agid dal studi.
A la fin dal studi, cura che quel saja lura vegnì evaluà, saja planisà in lavuratori cun la Lia Rumantscha e la Pro Grigioni Italiano per reflectar ils resultats, uschia Curdin Derungs. Quels duajan vegnir publicads la fin da matg.