L’Allianza dal Center e la Partida liberaldemocratica fan ina colliaziun da glistas – per las elecziuns federalas da l'october. Quai annunzian las duas partidas en ina communicaziun communabla.
La colliaziun da glistas cun l'Allianza dal Center è gia sa cumprovada en il passà
Il co-president da l'Allianza dal Center Kevin Brunold ha ditg ad RTR ch'els veglian er francar cun questa decisiun ch'i sajan propi ina partida dal center. I saja stà ina clera decisiun da betg colliar cun ina partida dals dus pols.
Noss commembers sa sentan il meglier en questa colliaziun da glista.
Gia tar las elecziuns naziunalas avant quatter onns avevi dà ina colliaziun da glistas da la PLD cun il Center – da lez temp anc la PBD e la PCD.
PPS sto puspè ir suletta
Entras la decisiun da la AdC e da la PLD èsi uss er cler che la Partida populara svizra sto er quest onn ir senza colliaziun da glista cun las grondas partidas burgaisas en il cumbat per las elecziuns naziunalas. Avant quatter onns aveva la PPS pers ses segund sez – quel da Heinz Brand – a la colliaziun dal clima. Discurs cun autras partidas n’han betg manà ad ina colliaziun da glistas, uschia ha era la Partida evangelica decis dad ir suletta.
Cuntinuitad tras e tras
Uss èsi cler co che las partidas grondas grischunas sa collian: Precis tuttina sco avant quatter onns. La Verda, la Partida verdliberala e la Partida socialdemocratica han gia avant passa in mais annunzià la repetiziun da l’allianza dal clima. Ils burgais han uss pia er annunzià da sa tegnair vid la colliaziun ch’ha purtà fritg avant quatter onns. Munta sut il stritg ch’ellas sa segireschan uschia ina a l’autra ils sezs. Er la PPS e la PS pon pli probabel salvar mintgamai in sez. Resta anc il sez ch’è uss en ils mauns da Sandra Locher Benguerel da la PS – ella na candidescha betg pli per in’ulteriura legislatura uschia che quai sez ballucca. El pudess tant restar tar l’allianza dal clima u er puspè crudar enavos tar la PPS.
