19 fotografias da differentas persunas pendan vi da las paraids-crap a l'entrada da la claustra da Mustér. Igl èn fatschas fitg differentas en alv e nair: fatschas giuvnas, veglias, seriusas e rientas.
-
Bild 1 von 3. Dorothee Pujol ha fatg tut las fotografias. Bildquelle: RTR.
-
Bild 2 von 3. Ses maletg da Vadjm Tashuk... Bildquelle: RTR.
-
Bild 3 von 3. ... e ses maletg da Plutarch Chiotopulos. Bildquelle: RTR.
La fotografa e manadra da migraziun da la Crusch Cotschna, Dorothee Pujol stat davant ina paraid alva e penda si las ultimas descripziuns. Sut mintga fotografia stat in num ed in curt text – ina giada per tudestg ed ina giada en la lingua materna da mintga persuna, p.ex. portugais, amaric (lingua discurrida en l'Etiopia) u dari (Afganistan/Iran). La finamira da l'exposiziun saja da mussar la varietad da Mustér, declera Dorothee Pujol.
A mai hai plaschì fitg bain, quant autentic che las persunas èn stadas en lur lieu preferì ed han sa laschà fotografar.
Las persunas purtretadas han elegì differents lieus a Mustér sco lur lieus preferids: l'entrada da la claustra, la staziun da Mustér u in bigl sur il vitg cun vista sin ils culms.
Sin ina fotografia ves'ins in um sin ina scala – sia fatscha para seriusa, sia egliada va or dal maletg. Vadjm Tashuk è vegnì avant quatter onns en Svizra pervia da la guerra en l'Ucraina. Dapi lura vivan el e sia famiglia a Mustér. Ses lieu preferì è avant la baselgia claustrala. Savens giaja el dumengia en baselgia, la cardientscha dettia ad el forza.
-
Bild 1 von 3. Vadjm Tashuk è fugì da la guerra en l'Ucraina avant quatter onns. Bildquelle: RTR.
-
Bild 2 von 3. Plutarch Chiotopulos viva dapi blers onns a Mustér. Bildquelle: RTR.
-
Bild 3 von 3. Lian Loretz è naschì a Mustér e viva gia sia entira vita là. Bildquelle: RTR.
Per el e sia famiglia saja Mustér daventà ina segunda patria. Rassissem na sentia el betg en ses mintgadi.
Ina persuna che ha fatg autras experientschas cun rassissem è Plutarch Chiotopulos. Ses lieu preferì è la plazza avant la claustra. Cun 7 onns è el fugì sco minoritad greca da la Tirchia en Svizra. Il rassissem haja accumpagnà el durant sia vita.
Sch'insatgi vegn en in pajais ester, na vegn el betg d'evitar experientschas cun refusaziun – saja quai rassissem u xenofobia.
Il sulegl stgauda las plattas da crap sin la plazza davant la claustra, e Plutarch Chiotopulos guarda sin il vitg da Mustér. Per el saja stà impurtant da far part da quest project, perquai ch'el saja ina persuna pertutgada – e dal tut davent na saja il rassissem anc oz betg.
L'exposiziun che ha lieu en il suler da l'entrada da la claustra Mustér, cumenzà ils 18 da mars e cuzza enfin ils 12 d'avrigl.