La cussegliera federala Elisabeth Baume-Schneider ha glindesdi preschentà davant las medias l'emprima strategia naziunala cunter rassissem ed antisemitissem.
Tenor l'Uffizi federal da statistica han 17% da la populaziun subì ina discriminaziun rassistica durant ils ultims tschintg onns. Quai èn var 1,2 milliuns persunas. «Las consequenzas èn savens gravantas – damain schanzas sin il martgà da lavur e d'abitaziuns, restricziuns economicas e sanitaras ed exclusiun sociala – ed han consequenzas per l'entira societad», argumentescha la regenza svizra.
Cun la strategia ademplescha la Confederaziun ina moziun or dal Cussegl naziunal.
Francar prevenziun e mesirar
Il Cussegl federal vul francar la prevenziun ed il cumbat cunter il rassissem e l'antisemitissem en las instituziuns publicas ed en la societad. Sia strategia stgaffeschia in rom d'acziun cuminaivel per la Confederaziun, per ils chantuns, per las citads e per las vischnancas, scriva el. El metta a disposiziun in instrument da lavur pratic che sa basa sin quatter champs d'acziun:
- In monitoring sistematic duai mesirar il rassissem.
- Rinforzar la protecziun ed ils dretgs da las persunas pertutgadas.
- Instituziuns duain vegnir sustegnidas dad identifitgar e da cumbatter la discriminaziun.
- Promover l'engaschament social.
La strategia naziunala cunter il rassissem e l'antisemitissem sa basa sin datas actualas sco il monitoring cunter il rassissem e l'evaluaziun da mesiras d'enfin qua. Las enconuschientschas spezialisadas da las autoritads, da las NGOs e da la scienza èn vegnidas integradas.
Analisas mussan: «Ils progress da la sensibilisaziun èn qua, i dovra ina meglra coordinaziun, datas solidas e la renconuschientscha da la discriminaziun structurala».
A partir da l'onn 2026 elavura il Servetsch per il cumbat cunter il rassissem ensemen cun la Confederaziun, cun ils chantuns, cun las vischnancas e cun la societad in plan d'acziun. Ina gruppa d'expertas e d'experts accumpogna la realisaziun che vegn evaluada regularmain. In'emprima bilantscha intermediara vegn preschentada al Cussegl federal il 2028.