- Il november ha il concordat da polizia da la Svizra Orientala dispensà per immediat tschintg aspirants. La raschun èn incidents da rassissem e sexissem a la scola da polizia. Tranter ils tschintg aspirants èn era dus da la Polizia chantunala grischuna.
- Ils corps da polizia chantunals da Son Gagl e Turgovia, sco er il corps da la citad da Son Gagl, han relaschà lur aspirants per immediat.
- La Polizia chantunala grischuna na vesa entant nagin motiv da relaschar ils aspirants dispensads.
Avant bun duas emnas èn vegnids public plirs cas da rassissem tar aspirants da la scola da polizia da la Svizra Orientala. Fertant che la polizia da Son Gagl e Turgovia ha relaschà ils aspirants per immediat, ha la Polizia chantunala dal Grischun decidì da desister d'ina relaschada. Las evaluaziuns da la polizia chantunala n'hajan cumprovà nagin malfatg dals dus aspirants grischuns.
Daco salva la Polizia chantunala grischuna ses dus aspirants?
Suenter ina examinaziun sajan ins vegnì a la conclusiun, ch'i na dettia nagins motivs per ina relaschada, hai num sin dumonda da SRF. «Ils dus aspirants han en il fratemp decidì d'interrumper la scolaziun ad Amriswil», scriva il post da medias da la Polizia chantunala. Per il corps saja il cas cun quai liquidà. Tge che capitia exact cun ils aspirants lascha la polizia dentant avert, malgrà pliras giadas dumandar.
En ina infurmaziun interna als collavuraturs tar l'incident, ch'è a disposiziun ad SRF, trametta la Polizia chantunala la medema communicaziun sco vers anora – dentant cun ina construcziun supplementara: «Eine interne Weiterbeschäftigung wird derzeit geprüft.» Questa part manca sin la posiziun externa. La Polizia chantunala na prenda betg posiziun en chaussa.
A la scola valia toleranza nulla, aveva ditg il president dad Ostpol a chaschun da la dispensaziun. Daco che la Polizia chantunala dal Grischun examinescha uss da salvar ils dus aspirants en il corps, resta avert. La Polizia chantunala na dat naginas ulteriuras infurmaziuns cun renviament a la protecziun da la persuna.
Funcziun d'exempel malgrà u forsa gist pervia toleranza nulla
A chaschun da la sessiun dal Cussegl grond ha er il minister da giustia e segirtad dal Grischun Peter Peyer – pia il schef da la polizia – prendì posiziun.
Ins na po betg eruir sche u tgi ch'è propi s'exprimì a moda rassistica.
Plinavant agiunta Peyer ch'i n'haja era betg dà expressiuns che sajan relevantas dal dretg penal anora. Ed era l'urden da scola na saja betg vegnì surpassà. Ultra da quai n'hajan ils dus aspirants betg ina tenuta rassistica.
Era sch'i vala en da quels cas atgnamain ina funcziun da toleranza nulla, haja la polizia er ina funcziun d'exempel. Numnadamain na possia la polizia betg scolar policistas e policists e mussar ad els d'esser fairs e nunpartischants e suenter betg agir cun las medemas valurs envers els. Perquai saja vegnì decis, ch'ils policists dastgan lavurar vinavant, respectivamain ch'els pon cuntinuar lur scolaziun en in'autra scola.
Tuttina na saja il cas anc betg liquidà, cunquai ch'i na pertutga betg mo ils aspirants grischuns, uschia Peter Peyer.
Rassissem, sexissem ed antisemitissem è deplorablamain puspè socialmain acceptabel. Perquai èsi tant pli impurtant da scolar e sensibilisar las persunas cunzunt en ils champs sensibels, sco tar la polizia.
Uschia haja gia dà il november passà ina scolaziun supplementara per tuttas aspirantas ed aspirants grischuns, di Peyer.
«Inculpaziuns betg fundadas» di il cumandant da polizia
Gia avant Peter Peyer è il cumandant da la Polizia chantunala grischuna, Walter Schlegel s'exprimì en chaussa. El ha declerà daco ch'ils dus aspirants grischuns dastgan restar tar la polizia, cuntrari als auters trais aspirants. Mo sin basa dal rapport n'hajan ins betg pudì decider, perquai haja dà scleriments e quels hajan mussà ch'ils inculpads na sajan nagins rassists e ch'i na saja er betg da constatar posiziuns rassisticas. Perquai sajan las renfatschas betg fundadas. I dettia dus motivs daco ch'ins saja vegnì a questa conclusiun.
Per l'ina na constat il temp betg – da quel temp n'era la persuna gnanc a la scola da polizia ad Amriswil. Per l'autra èn las remartgas uschè pauc concretas ch'ins na po gnanc giuditgar sche quellas èn rassisticas.
Plinavant di Walter Schlegel che tut ils tschintg cas sajan differents e perquai vegnian quels er tractads different. Mintga singul corp decida sch'i dat consequenzas dal dretg da persunal. D'in auter avis è il president dad Ostpol, Jürg Zingg stà al cumenzament da december. Per ina reacziun sin las explicaziuns dal cumandant da polizia dal Grischun è el però betg stà cuntanschibel.
Reacziuns da la politica
Entant ha il cas er bittà undas en la politica grischuna. La PS Grischun pretenda ina strategia da toleranza nulla envers rassissem e sexissem, oravant tut sch'i pertutga las autoritads dal stadi sco la polizia. Quai ha Julia Müller, la presidenta da la PS Grischun ditg. Ch'il cas vegn examinà da rudent spera tant la PS sco er la PPS. Walter Grass, president da la fracziun da la PPS Grischun di er ch'i valia la presumziun d'innocenza enfin che las examinaziuns èn terminadas.
Sco tut ha cumenzà: Ostpol annunzia 5 dispensaziuns
Tschintg aspirants da polizia hajan cuntrafatg a l'urden da la scola da polizia ed al codex europeic d'etica da polizia e sajan perquai vegnids dispensads da lur corps. La raschun: remartgas rassisticas e sexisticas a la scola da polizia ad Amriswil en il chantun Turgovia. Uschia ha il concordat da polizia da la Svizra Orientala infurmà ils 19 da november. Els duain avair derasà cuntegns respectivs en regiuns «nun-publicas» da la scola da polizia. En tge furma e dimensiun n'è betg enconuschent.
I haja dà expressiuns discriminantas concretas che na sajan betg tolerablas per policists, ha ditg il president dad Ostpol, Jürg Zingg, da lez temp a radio SRF. Perquai che l'entir cas n'è betg capità en il spazi public n'ha quai dà nagina procedura penala. Tuttina han ils corps pertutgads, las polizias chantunalas da Turgovia e Son Gagl, sco era la polizia da la citad da Son Gagl, decidì da relaschar lur aspirants. La polizia chantunala dal Grischun è ida in'autra via.