A Tavau hai mardi para puspè dà attatgas violentas cunter giasts gidieus, quai be in onn suenter in incident spezialmain serius dad odi cunter gidieus. Quai scriva la gasetta online Südostschweiz. Jonathan Kreutner, secretari general da la Federaziun svizra da las communitads israelitas (SIG), ha rapportà d'almain trais incidents nua ch'ina persuna haja attatgà persunas da parita gidieua.
Para ch'ina persuna è ida tras Tavau ed ha attatgà intenziunadamain persunas da parita giudaica.
Las victimas han rapportà d'insultas, ch'i saja vegnì spidà sin ellas, ch'ellas sajan vegnidas stumpladas, persequitadas e perfin da smanatschadas cun la mort – ha explitgà Jonathan Kreutner. Ad el han ins annunzià ils incidents che sajan capitads en differents lieus, tranter auter en ina stizun, en in bus u al Lai da Tavau.
Connex plitost cun la situaziun en il Proxim Orient
Kreutner excluda in connex da las attatgas cun il turissem giudaic e vesa il motiv plitost en la situaziun politica dal Proxim Orient. Las persunas pertutgadas hajan annunzià da far ina denunzia, e la Polizia chantunala grischuna ha confermà d'avair survegnì ina annunzia correspundenta. Ins intercureschia uss il cas.
Il secretari general da la SIG Jonathan Kreutner spera ch'il delinquent vegnia tschiffà svelt per evitar ulteriuras attatgas.
Adina puspè attatgas sin gidieus
En il passà hai gia dà pliras attatgas sin giasts gidieus a Tavau, là saja la vita gidieua il pli visibel en il Grischun. Tenor il rapport naziunal davart antisemitissem èn vegnids registrads l'onn passà otg incidents en il Grischun, set da quels a Tavau.
En il cas il pli gravant da l'onn passà a Tavau èn vegnids arrestads dus umens che han spidà sin in giast giudaic, han pitgà quel e clamà il slogan «Free Palestine». Quest incident è in dals cas ils pli grevs d'antisemitissem en Svizra l'onn 2024. Auters cas d'antisemitissem èn stads insultas vers giasts gidieus e duas brevs cun cuntegns antisemitics.
Kreutner aveva envers la Südostschweiz avertì d'in augment da l'antisemitissem, cunzunt suenter las attatgas da la Hamas sin l'Israel l'october 2023. Malgrà ils incidents ha Kreutner punctuà che Tavau saja da princip in lieu segir per giasts giudaics.
El haja constatà che la gronda part dals giasts gidieus restia optimistica e giaudia las vacanzas a Tavau.
Or da l'archiv:
Tavau è in magnet per giasts gidieu-ortodoxs. Ma adina puspè datti renfatschas d'antisemitissem. Malgrà che bleras persunas na ristgan betg da s'exprimer, èsi reussì als Cuntrasts da discurrer cun purs e turistichers e nus avain schizunt survegnì in'invista en il mintgadi d'ina famiglia ortodoxa.