Suenter in onn mesiras per la convivenza ch'ina taskforce ha fatg a Tavau saja la situaziun tranter giasts giudaics ortodox e persunas indigenas sa meglierada. Quest facit tira il secretari general da la Federaziun svizra da communitads israelitas Jonathan Kreutner. Era il president da la organisaziun da la destinaziun Tavau Reto Branschi è d'accord. Concret hai dà pli paucs incidents antisemitics e pli paucas malchapientschas tar circa medem blers giasts.
Ils ultims onns avevi dà conflicts en restaurants, perquai ch'ils giasts giudaics han prendì cun lur atgna marenda e betg consumà en il restaurant. U alura n'hajan els betg fatg plazza sin il passape u hajan laschà enavos rument. Il project da dialog «Likrat Public» che duai intermediar tranter persunas indigenas e giasts giudaics exista dapi il 2019. La stad 2023 era el vegnì interrut.
Nus tirain cleramain ina bilantscha positiva. I dat adina potenzial per meglierar la chaussa, dentant tut en tut èsi stà in project da pilot positiv.
Ina chaussa che Reto Branschi ha menziuna è ch'ils Likratinos e las Likratinas – pia las persunas che intermedieschan – pudessan anc esser pli activas envers persunas. I faschess era senn che durant l’avust, nua che blers giasts giudaics ortodox rivan a Tavau, èn enturn dapli persunas che intermedieschan. Enfin uss eran quai 8 enfin 10 Likratinos e Likratinas ch'eran preschents als lieus, nua ch'era blers giudaics eran en gir. Atras quai che il project vegn prolungà è la Federaziun da las communitads israelitas a la tschertga da persunas giudaicas che intermedieschan durant la stad.
Adattà al tema
Tavau è in lieu da vacanzas per blers giudieus-ortodoxs da tut il mund. Ma adina puspè datti renfatschas d’antisemitissem. En l'emissiun «Cuntrasts» è RTR ì sin ils fastizs dals conflicts ed ha discurrì cun purs, gastronoms, turistichers ed ina famiglia ortodoxa che fa vacanzas.