La Ems Chemie ha fatg l’emprima mesadad da l’onn damain svieuta, ma dapli gudogn: La svieuta saja sa reducida levet per 0,8% sin bun ina milliarda francs, cumpareglià cun la medema perioda da l’onn passà. D’attribuir saja quai tranter auter al ferm franc svizzer. Il gudogn operativ saja s’augmentà per 4,7% sin 310 milliuns francs. Quai ha communitgà il concern da chemia grischun.
Per l’entir onn da gestiun ha la Ems Chemie augmentà la prognosa: Da nov quinta ella cun ina svieuta che saja mo pli levet pli bassa che l’onn passà. Lura ha Ems fatg ina svieuta da bunamain duas milliardas francs.
La scheffa dal concern Magdalena Martullo è en sasez cuntenta cun l'emprim mez onn. Ils temps turbulents dals ultims mais sajan stads ina sfida per il concern. I saja stà fitg grev d'anticipar ils pretschs da las materias primas, cunzunt cun il cumenzament da la guerra tranter l'Iran ed ils Stadis Unids.
I resta vinavant malsegir tge che vegn a capitar en la guerra tranter l'Iran ed ils Stadis Unids. Ins sto restar flexibel.
Era la politica dals Stadis Unids chaschunia ina ulteriura malsegirezza, ins na possia betg quintar sin quella, era quai saja ina sfida. Medemamain haja il concern pudì sa focusar sin novas tecnologias sco roboters, datacenters ed autos electricas.