Bleras staziuns d’urgenza d'ospitals en Svizra èn surchargiadas, quai n'è nagin fenomen nov. Organisaziuns da pazientas e pazients sco er federaziuns spezialisadas han adina puspè avertì da quest problem. Ussa duai ina pauschala da 50 francs far remedura e distgargiar ils ospitals. Il Cussegl naziunal vul introducir la taxa per che tuttas e tuts pondereschian duas giadas avant che ir sin la staziun d'urgenza.
En l'Ospital chantunal dal Grischun a Cuira èn ins però sceptics envers questa proposta. Malgrà ch'il dumber da pazientas e pazients che vegn a la staziun d'urgenza crescha, ha il schefmedi d'urgenza Thomas Müller ditg envers il schurnal regiunal da SRF che la taxa da 50 francs saja la fallada via. E quai en spezial per in chantun turistic e da muntogna sco il Grischun.
I pudess dar bleras excepziuns en il chantun Grischun
Exclus da la pauschala duain tranter auter esser turistas e turists ch'han in accident en il Grischun. La regulaziun vegn numnadamain betg applitgada en cas d'in accident mabain «be» en cas da malsogna. Ed accidents datti adina blers en il Grischun. En tals cas fiss la taxa obsoleta. Perquai saja da metter en dumonda sch'il chatsch a staziun d'urgenza vegnia propi pli pitschen, agiunta Thomas Müller ch'è er en suprastanza da l'associaziun svizra per medischina d'urgenza. Quella refusa la taxa en la furma actuala. Quai er pervia da la gronda lavur administrativa. Sche la taxa d’urgenza daventa la finala realitad u betg, duain ils chantuns pudair decider sezs.
Dapli lavur administrativa
Decisiv sch'insatgi sto pajar ina taxa d'urgenza u betg saja il chantun d'abitar e la regulaziun da lez. Quai muntia pia ch'il persunal stoppia sclerir danunder ch'insatgi vegnia e metter quint tut tenor regulaziun. Per Thomas Müller fissa quai proceder per in chantun sco il Grischun cun bler turissem ina lavur en pli insupportabla. «Di per di fissan nus confruntads cun questa lavur supplementara senza ch'ella vegn indemnisada».
L'Ospital chantunal grischun ha per ina gronda regiun la funcziun da medi da chasa.
In ulteriur punct dispitaivel è l’assegnaziun tras la media u medi da chasa. Er en quels cas crudass davent la pauschala da 50 francs. Quai saja tenor Thomas Müller ma er la regenza grischuna problematic. Tut tenor regiun na saja gnanc pussaivel da tschertgar l’emprim ina pratica da medi da chasa, cunzunt betg durant la notg. Müller cumplettescha: «Ils temps, durant ils quals medias e medis da chasa èn stads en acziun 24/7 èn passads. Per ina regiun gronda surpiglia l’Ospital chantunal dal Grischun la notg e las fins d’emna la funcziun da medi da chasa.»
La regenza grischuna tema ch'i dettia in tractament inegual d'abitantas ed abitants dal Grischun. La tenuta da la regenza en questa dumonda è impurtanta per l’ospital. Pertge sche la lescha avess d'ir en vigur, decidan ils chantuns davart l’introducziun da questa taxa. Suenter il Cussegl naziunal decida sco proxim il Cussegl dals chantuns, sche la taxa d’urgenza da 50 francs duai valair u betg.