En emprima lingia èsi planisà in portal dad e-government, per che la populaziun possia liquidar a moda digitala las fatschentas cun l'administraziun chantunala. Er vischnancas, regiuns ed ulteriuras autoritads pon nizzegiar quest portal e porscher là tscherts servetschs digitals. En la lescha vegn uss reglada l'organisaziun, il manaschi ed il diever da quest portal. Quai communitgescha il Departament da giustia dal Grischun.
Gia la stad 2018 aveva la regenza deliberà la strategia dad e-government per ils onns 2019-23 cun la finamira da rinforzar purschidas digitalas en il Grischun.
Correspundenza electronica
Actualmain n'è ina communicaziun cumplettamain electronica betg pussaivla, cunquai ch'i dovra per part anc adina ina suttascripziun a maun. Quai duai sa midar: Cun il nov portal dad e-government vul la regenza grischuna remplazzar la suttascripziun a maun tar la correspundenza cun las autoritads chantunalas.
Enfin il november pon organisaziuns prender posiziun davart il sboz per questa lescha.
