Violenza en la famiglia ed en il partenadi sco era violenza che sa drizza sistematicamain cunter persunas pervia da lur schlattaina, èn chastiablas e na vegnan betg toleradas en nossa societad. Tuttina èn questas furmas da violenza derasadas en Svizra e pertutgan tut las classas socialas. Violenza po vegnir applitgada en furma da violenza corporala, psichica, sexuala ed economica.
Spezialmain difficila è la situaziun per persunas pertutgadas da violenza, ch'èn dependentas emoziunalmain, finanzialmain, pervia dal dretg da dimora u en in'autra moda e maniera da la persuna violenta. Per questas persunas èsi ordvart difficil da sa distatgar d'ina relaziun violenta – tant pli impurtants èn mecanissems da protecziun efficazis ed ina stretga collavuraziun dals posts involvids.
Violenza n'ha betg plaz en nossa societad
Ina nova lescha duai rinforzar la collavuraziun interdisciplinara sco era promover in proceder coordinà per prevegnir e per cumbatter la violenza a chasa e la violenza specifica per la schlattaina. Cumpetent per la coordinaziun e la promoziun d'ina collavuraziun interdisciplinara e professiunala en il chantun è il Post da coordinaziun Violenza a chasa.
Betg sco ultim è la lescha er in cler signal, che la violenza n'ha betg plaz en nossa societad e ch'ella vegn impedida e cumbattida sistematicamain.
La consultaziun da la lescha cunter violenza a chasa dura dals 18 da settember fin ils 18 da december 2025.