Cunquai possia la Repower extender vinavant il diever da la forza idraulica cun l'ovra electrica ch'exista gia a Küblis, communitgescha la regenza. Cun il project da Chlus duai l'aua or da l'ovra a Küblis, l'aua da la Landquart a Küblis e las auas da l'Arieschbach, dal Furnerbach e dal Schranggabach vegnir tramess tras ina gallaria da pressiun en l'areal d'industria da Trimmis, en la nov'ovra. Da là va l'aua enavos en il Rain.
La Repower è londervi da finir il project da construcziun per ch'els possian inoltrar il project tar il chantun uschè baud sco pussibel, ha accentuà il mainaproject tar la Repower Marco Cortesi.
Sche tut va bain survegnin nus il permiss il 2026.
I sajan vi da finalisar ils ultims pass e l'idea è da far quai anc questa stad. Suenter dovra il chantun temp dad evaluar la dumonda. Sche tut giaja bain survegnia la Repower il 2026 la lubientscha. Sche quella è avant maun pon ins concretisar il project.
Impurtanza naziunala
L'ovra da «Chlus» vala sco project d'impurtanza naziunala e vegn en l'avegnir a producir energia per 50'000 chasadas l'onn. El è numnà explicitamain en la lescha federala davart in provediment d'electricitad segir cun energias regenerablas. Sin la glista originala d'ovras da muntada naziunala n'era Chlus betg:
Il project ‹Chlus› è in project impurtant per il provediment d'energia persistent en il Grischun ed en l'entira Svizra.
Cun l'approvaziun da la concessiun saja il project in grond pass vinavant, di la cussegliera guvernativa Carmelia Maissen. Sco proxim sto la Repower inoltrar la dumonda d'approvaziun per il project.
Cumpensar l'effect negativ sin la natira
Tras las lavurs da construcziun vegni a dar effects negativs sin la cuntrada, quai na possian ins betg evitar, scriva la regenza. Per cumpensar quai vegnan creads novs spazis da viver equivalents u vegn augmentada la valur da spazis da viver existents.
Tranter auter vegn in traject da var quatter kilometers dal Mühlbach ad Igis revitalisà. Quel è actualmain per gronda part chanalisà ed artifizial. Tras il project Chlus vegnian era las midadas da la deflussiun da l'aua en la Landquart eliminadas. Quai prestia ina contribuziun decisiva a la sanaziun da las auas.