Puncts culminants da las festivitads sajan stads in cortegi e l’act festiv uffizial la dumengia, ils 6 da fanadur 2025, sco ch’il comité d’organisaziun ha scrit en ina communicaziun. A l'act festiv han fatg part il president da la regenza grischuna Marcus Caduff, il Landeshauptmann dal Tirol dal Sid Arno Kompatscher, il president da la provinza Sondrio Davide Menegola e l’assessur regiunal da la Lumbardia Massimo Sertori. Preschents eran era represchentantas e represchentants da las vischnancas cunfinantas, da la vischnanca Val Müstair la presidenta Gabriella Binkert Becchetti, da Bormio la presidenta Silvia Cavazzi, da Stilfs il president Franz Heinisch e da Prad il president Rafael Alber.
Collavuraziun sur cunfin
«Per nus Svizras e Svizzers è la via dal Stelvio e natiralmain er il Pass da l’Umbrail ina colliaziun directa cun la Lumbardia e cun il Tirol dal Sid», ha ditg Marcus Caduff, ch’en quest senn saja la festa communabla sin il Stilfser Joch in’expressiun da la collavuraziun e la convivenza sur cunfin. Gabriella Binkert Becchetti, ella presidiescha era la Regiun Engiadina Bassa Val Müstair, ha ditg ch’ils trais pajais discurrian bain differentas linguas, «ils basegns e las sfidas èn però dapertut sumegliantas». Ch’i saja perquai impurtant da sviluppar communablamain strategias che resguardian ils interess da tut las trais regiuns cunfinantas.
Istorgia al lieu
La via dal Stelvio è vegnida construida en be tschintg onns, dal 1820 fin il 1825. Cun sias 82 stortas e sis tunnels signifitgava la construcziun da questa via da ses temp in capodovra. Ozendi attira questa via autalpina istorica visitadras e visitaders da dalunsch e damanaivel. Durant il suentermezdi han las persunas preschentas pudì admirar ina ventgina da vehichels istorics e giudair buntads culinaricas dal Tirol dal Sid, la Lumbardia e la Svizra. Gia la sonda è stada la via dal Stelvio in lieu per in inscunter: Var 150 oldtimers cun raritads sco l'auto da cursa «Silberpfeil» da l’onn 1934 u il «Alpensieger» dal 1913 eran da la partida.
Or da l'archiv: